भारतीय संविधान प्रस्तावना सयत जोडप्याचे प्री- वेडिंग शूट
भांगरभूंय | प्रतिनिधी
हैदराबाद, खबरां संस्था ः हैदराबादांतल्या एका जोडप्यान प्री- वेडिंग शूटांत भारतीय संविधान प्रस्तावना आस्पावन घेतली. प्री- वेडिंगांत संविधानाची प्रस्तावना आस्पावप ही चलयेची कल्पना आशिल्ली. 29 मार्च 2024 दिसा #ReclaimConstitution ह्या अधिवेशनांत वांटो घेतले उपरांत चलयेक ही कल्पना सुचली. हाचे उपरांत तिणें आपल्या जावपी न्हवऱ्याकय हे खातीर मनयलो. अशें केल्ल्या जोडप्यान आपलीं वळख उक्ती केल्ली ना.
#ReclaimConstitution म्हणल्यार कितें?
विनय कुमार (38) हो एरोस्पेस अभियंतो. तांणे संविधानाचे 23 पोस्ट कार्ड वांटून 26 जानेवारी 2024 दिसा #ReclaimConstitution सुरू केलें. स्वतंत्र भारतांतल्या नागरिकांक न्याय, समता आनी स्वातंत्र्य ह्या तत्वांविशीं जागृत करप हो तांचो हेत आसा.
ही कल्पना कशी आयली?
2019 वर्सा नागरीकत्व दुरुस्ती कायदो (CAA) आड जाल्ल्या निदर्शनां वेळार संविधान आनी ताची प्रस्तावना चर्चेत आशिल्ली. तेन्ना विनयाची नदर ताचेर पडली. संविधाना संबंदीत जायते वाद पळोवन आनी आयकून तांका संविधानाची चड लागींच्यान वळख जाली. ताणें हाचेर संशोधन करून #ReclaimConstitution सुरू करपाचो विचार केलो. पूण त्या वेळार कोविडाक लागून ते सुरू जावंक शकले ना. पूण अंदूं विनय हाणें नाझी काळांत जर्मनींतल्या प्रतिकार मोहिमेक लागून प्रेरीत जावन पोस्टकार्ड वांटपाची माळ सुरू केली. तांच्या ह्या वावरान उच्च न्यायालय आनी संविधान तज्ञांचेंय लक्ष ओडून घेतलें.
‘द हिंदू’च्या खबरां प्रमाण विनय कुमार म्हणटा, लग्न सुवाळ्यांत एका जोडप्यान संविधानाचो आस्पाव करपाची ही पयलीच खेपेची गजाल न्हय. किरण दवे नांवाचे बायलेनय आपल्या लग्नांत अशेंच कितें तरी केल्लें अशें तांणी सांगलें. किरणान लग्नांतल्या सोयऱ्यांक #ReclaimConstitution कडल्यान तयार केल्लीं टोट बॅगां (खास छाप वा घोशणा आशिल्लीं बॅगां) भेटयली.
संविधानांत बरयल्ल्या तत्वां विशीं लग्नांतल्या सोयऱ्यां मदीं जागृताय निर्माण करपाक आमी सोदतात अशें किरणान सांगलें. खास करुन तर राजकारणा पसून पयस रावपी पिळगेंत. विनय हाका आपली पोस्टकार्ड कल्पना यशस्वी जाल्या हें कळटकच ताणे टोट बॅगां आनी टीशर्ट घालून आपल्या #Reclaimconstitution चो प्रचार केलो.
केरळांतल्या एबी आर आनी देविका देवरंजन ह्या जोडप्याचें ऑक्टोबर 2023 वर्सा लग्न जालें. ताणें संविधानाच्यो 1000 प्रती लग्नांतल्या सोयऱ्यांक वांटल्यो. तांच्या लग्नाच्या पत्रिकेर डॉ बी. आर. आंबेडकर आनी जवाहरलाल नेहरू हांचेय फोटो आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
