भांगरभूंय | प्रतिनिधी
घर सांबाळपाचें काम आसूं वा ऑफिसांत काम आसूं; सगळ्या गजालीं खातीर कश्टाची गरज आसता. घर सांबाळपी दरेक बायल सकाळीं सगळ्यांत पयलीं जागी जाता आनी सगळीं कामां पुराय करून निमाणी न्हिदपाक वता. दुसरे वटेन ऑफिसांत वचपी लोक सकाळीं बेगीन घरांतल्यान भायर सरतात. रेल्वे, बसीन प्रवास करतात आनी आठ-णव वरां ड्युटी करतात आनी उपरांत रातच्या वेळार घरा येतात. हें सगळें करतना चड करून भलायकेचे त्रास जशे थकिल्ले वरीं दिसप, ताण आनी चाळवप निर्माण जातात. ह्या सगळ्यांचेर उपाय म्हणून आमी फकत थोडो वेळ न्हीद म्हळ्यार विसव घेतात.
आमचे एकंदर भलायके खातीर विसव घेवप खूब म्हत्वाचें. मात, विसव म्हळ्यार फकत रातची न्हीद? तर ना… आपलें भावनीक, शरिरीक आनी आध्यात्मीक संतुलन राखपा खातीर न्हिदे सयत सात तरेचो विसव घेवपूय दरेकल्या खातीर तितलेंच गरजेचें. म्हणूनच आयज आमी ह्या लेखांतल्यान हे विशीं आनीक जाणून घेतले. विसव घेवपाचे कितले प्रकार आनी ते खंयचे, हें आयज आमी जाणून घेवया.
सेक्रेड रेस्ट : रिकव्हर युअर लाइफ, रिन्यू युअर एनर्जी, रिस्टोअर युअर सॅनिटी ह्या पुस्तकांचे लेखक डॉक्टर सौंद्रा डाल्टन-स्मिथ हांच्या मतान, न्हिदप हो एकूच उपाय ना. आमच्या शरीर आनी मनाक योग्य तरेन कार्यरत दवरपाक विंगड विंगड तरेच्या विसवाची गरज आसा. कारण- विसवाचो दरेक प्रकार तुमच्या शरिरांतली उर्जा पातळी नियंत्रणांत दवरपाक मजत करता. ताका लागून विसवाचे हे सात प्रकार समजून घेवप आमच्या सगळ्यां खातीर फायद्याचे थारतले.
विसवाचे हे सात प्रकार म्हळ्यार शरिरीक, मानसीक, भावनीक, संवेदनात्मक, क्रिएटिव्ह, समाजीक आनी आध्यात्मीक.
१. शरिरीक विसव
शारिरीक विसव म्हणल्यार आमी दीसभर करतात त्या कामा पसून मात्सो विसव. न्हिदे वांगडाच शरिरीक विसव मेळोवपा खातीर कांय गजाली करूं येतात. जशें, १. ताणून घेवप, २. मात्सो वेळ न्हीद घेवप, ३. मालीश करप, ४. मात्सो विसव घेवप, ५. भोंवपाक वचप अश्या गजालींचो आसपाव आसा. जेन्ना आमी शारिरीक रितीन विसव घेतात. तेन्ना आमी आमच्या स्नायूंक दुरुस्त जावपाक आनी फ्रेश जावपाक वेळ दितात.
२. मानसीक विसव
मानसीक विसव म्हळ्यार दर दिसा आमच्या मनांत येवपी मानसीक ताणांतल्यान विसव घेवप. आमी अशा संवसारांत रावतात, जंय सदांच कितें तरी घडटा. देखून मेंदवाक थोडो वेळ भलायकी सांबाळपा खातीर विसव दिवप फायद्याचें थारता. मानसीक विसव घेवपाक तुमी कांय गजाली करूं येतात:जशें, १. तुमचो फोन बंद करचो, २. सोशल मिडिया पासून स्वताक पयस दवरात, ३. ध्यान करप, ४. दर दिसा कांय मिणटां एकेच सुवातेर शांतपणान बसून व्हडलो उस्वास घेवचो. जेन्ना मानसीक विसव घेतना आमच्या मेंदवाक रिचार्ज जावपाक वेळ दितात. ताका लागून आमकां लक्ष केंद्रीत करपाक, सक्रीय रावपाक आनी जागृत रावपाक मदत जाता.
३. भावनीक विसव
भावनीक विसव म्हळ्यार दिसपट्ट्या ताण दिवपी गजालीं पासून विसव. भावनीक विसव घेवपाक तुमी सकयल दिल्ल्यो गजाली करच्यो, १. एकटो वेळ घालोवप, २. ताण दिवपी परिस्थिती टाळप, ३. विस्वासांत घेवपा सारक्या इश्टां कडेन संवाद सादप, ४. स्वताची जतनाय घेवप (सेल्फ कॅर), ५. जर्नलिंग म्हणल्यार दिसपट्टी डायरी बरोवप, ६. सैमाक लागीं आशिल्ल्यो गजाली करूं येतात. हीं सगळीं कामां केल्यार तुमकां स्वता खातीर वेळ मेळटलो. तुमकां भावनीक समतोल दवरपाक मेळटलो आनी हाका लागून तुमचें चाळवप उणें जातलें. भावनीक शिथीलताय खास करून आव्हानात्मक आसूं येता. कारण- आमी चड करून स्वता खातीर वेळ काडून स्वताक दोश दितात. पूण, स्वताची काळजी घेवपाक, स्वता खातीर वेळ दिवपाक स्वार्थ ना हें लक्षांत दवरचें.
४. संवेदनात्मक विसव
दर दिसा आमकां दिस-रात आवाज, उजवाड आनी हेर साधनांचो संपर्क येता. देखून ह्या साधनां वरवीं तुमच्या इंद्रियांक विसव दिवप म्हणल्यार इंद्रियांचो विसव. देखून संवेदनात्मक विसवा खातीर तुमी तुमचे जिणेंत सकयल दिल्ल्या गजालींचो आस्पाव करूंक शकतात. जशें, १. टीव्ही बंद दवरप, २. दोळे बंद करून शांत बसप, ३. शांत कुडींत वेळ घालप, ४. न्हावप, ५. शांत (सायलंट) गीत आयकप, ६. तातूंत खोल उस्वास घेवपाची सराव करप हांचो आस्पाव जाता. जेन्ना आमी आमचीं इंद्रियां शिथील करतात तेन्ना ताका लागून कुडींतल्या संवेदनांचो भार मनांतल्यान वा तकलेंतल्यान काडून उडोवंक आनी ताण उणो करपाक मजत जाता.
५. क्रिएटिव्ह (सृजनशील) विसव
सृजनशील विसव म्हळ्यार दिसपट्ट्या कामांतल्यान म्हळ्यार घरांतल्या वा ऑफिसांतल्या कामांतल्यान विसव घेवन हेर कसलीय आवड आसप. ह्या विसवा खातीर तुमी सकयल दिल्ले पर्याय वापरून पळोवंक शकतात. जातूंत १. दिसपट्ट्या कामांतल्यान विसव घेवप, २. एक आवड पाळप, ३. तुमकां आवडटा अशें कितें तरी म्हणल्यार चित्रकला, विणकाम, रांदप; हे उपक्रम राबोवचे. जेन्ना आमी सृजनशील विसव घेतात तेन्ना आमी स्वताक नव्या गजालींचो विचार करपाक वेळ दितात; जें आमकां प्रेरीत करपाक आदार करता.
६. समाजीक वा सोशल विसव
समाजीक वा सोशल विसव म्हळ्यार आमी दर दिसा करतात ताचे परस वेगळें कितें तरी करप. दिसपट्ट्या कामाक लागून कुटुंबा खातीर, इश्टां खातीर आनी स्वता खातीरय वेळ काडप शक्य नासता. देखून समाजीक विसव घेवपाक सकयल दिल्ले पर्याय वापरूं येतात. जातूंत १. एकटो वेळ घालोवप, २. लागींच्या इश्टां वांगडा आनी कुटुंबां वांगडा वेळ घालोवप, ३. एकटोच भोंवप, ट्रेकिंग वा हॉटेलांनी जेवप, ४. तातूंत स्वताची जतनाय घेवप हांचो आस्पाव जाता. ही शिथीलताय फकत ताण, चिडचिडेपण उणी करतली आनी हेरां कडेन जोडपाकूय मजत करतली.
७. आध्यात्मीक विसव
आध्यात्मीक विसवांत ध्यान, प्रार्थना, तुमकां आवडटा तें पुस्तक वाचप, सैमांत वेळ घालोवप, योग हांचो आस्पाव येता. जेन्ना आमी आध्यात्मीक रितीन विसव घेतात तेन्ना आमी आमच्या भितरल्या स्वता कडेन जोडपाक आनी आमच्या जिवितांत अर्थ सोदपाक वेळ दितात; जें आमकां जिणेच्या दर एका मळार स्थिर रावपाक आदार करता.
ह्या सात तरांचो विसव तुमचे दिसपट्टे जिणेंत आस्पावन घेवप कठीण जावं येता. मात, तुमच्या एकंदर बर्यापणा खातीर तें सामकें गरजेचें. हे सात प्रकारचे विसव तुमचे जिणेंत कशे आस्पावन घेवचे हाचे विशीं कांय टिप्स जाणून घेयात:
एक शेड्युल तयार करात: दर एका प्रकारच्या विसवा खातीर वेळापत्रक तयार करात आनी तुमचे जिणेंत ताका प्राधान्य दिवचें. जशें तुमी तुमचीं वेगवेगळीं कामां वा व्यायामांची वळेरी तयार करतात, तशें केन्ना केन्नाय विसव लेगीत घेवंक दिवचें.
विसव घेयात: दिसभर बारीक बारीक विसव घेवन कुडीक आनी मनाक विसव दिवचो. भोंवपाक वचप, ध्यान करप वा फकत व्हडलो उस्वास घेवप.
मर्यादा थारावची: तुमच्या वेळाक आनी उर्जे खातीर ह्या दोनांय खातीर एक मर्यादा थारावची. कितेंय आवडना जाल्यार ना म्हणपाक शिकात. तशेंच गरज पडटा तेन्ना मदत मागपाक भियेवंक नाकात.
स्वताक डिस्कनेक्ट करात: तुमच्या मनाक विसव दिवपा खातीर नेमान तंत्रगिन्यान आनी सोशल मिडिया पासून पावल पयस दवरचें.
प्रयोग : वेगवेगळ्या प्रकारच्या विसवाचे प्रयोग करात आनी तुमकां कितें बरें काम करता तें सोदून काडात. दरेकल्याच्यो गरजो वेगवेगळ्यो आसतात. देखून खंयच्या विसवाचो प्रकार तुमकां शांती दितात तें सोदून काडात आनी तांकां नेमांत आस्पावपाचो यत्न करात.
संवय करात: विसव घेवपाची तुमचे जिणेंत संवय करात. तुमच्या दिसपट्ट्या वेव्हारांत ताचो आस्पाव करात आनी ही विसवाची संवय तुमची स्वताची जतनाय घेवपाच्या सरावांतलो एक वांटो करात.
ह्या सात तरेच्या विसवांचो तुमचे सदचे जिणेंत आसपाव करून घेयात. हें करपाक वेळ लागूं येता. मात हें करप फायद्याचें थारतलें. विसवाक प्राधान्य दिल्यार तुमी चड समतोल आनी सुखी जीण जगपाक शकतात. देखून विसव घेयात आनी तुमचे कुडीची आनी मनाची योग्य जतनाय घेयात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
