भांगरभूंय | प्रतिनिधी
काम दिसतालें सोंपें. जातलें रोखडेंच. निधीय भरपूर आसा…. असो विचार करून तें हातांत घेतलें, पूण एक वर्स जालें, दोन वर्सां जालीं, तीन जायत आयलीं तरीय काम सोंपून सोंपना. आयज येतलो, फाल्यां येतलो पावोन पावना… तशी गत आतां स्मार्ट सिटीची जाल्या. सिवरेज, अंडरग्रावंड केबलींग सोडल्यार हेर कामांची तशी गरजूच नाशिल्ली, अशेंय लोक उलोवपाक लागल्यात. कोण चूक, कोण बरोबर हाचेर वाद- विवाद जावं येतात. पूण, ह्या स्मार्ट सिटीक लागून पणजेकार आनी भायल्यान येवपी सगल्या लोकांक त्रास, मनस्ताप सोंसचो पडला. गरीब वेपाऱ्यांच्या पोटार पांय पडला, हें स्मार्ट सिटीच्या भक्ताक पसून कबूल करचें पडटलें. अर्थांत ताणें मेंदू घाणाक दवरूंक ना जाल्यार!!
गोंयच्या मुंबय उच्च न्यायालयाचे न्या. महेश सोनक आनी न्या. वाल्मिकी मिनेझीस हांणी काल पणजी स्मार्ट सिटीच्या कामांची पळोवणी केली. तांकां इमॅजीन पणजी स्मार्ट सिटी लिमिटेडाचे सीईओ संजीत राॅड्रिग्स हांणी कामाची म्हायती दिली. न्यायाधिशांनी नेमकी कितें प्रतिक्रिया उक्तायल्या, कामा विशीं ते समाधानी आसात, काय नात, हें तांणी तांकां सांगलांच आसतलें. मात, आयज न्यायाधीश येतात, म्हूण शारांतल्या सगल्या रस्त्यांचेर उदक मारिल्लें. बेगीन करप शक्य आसा, तीं कामां केल्लीं. धुल्ल जावचो ना, हाची खबरदारी घेतिल्ली. हीच तत्परताय स्मार्ट सिटी लिमिटेडान अदीं मदीं घेवपाक जाय आशिल्ली. कारण ह्या कामांक लागून कांय अपघात जाल्यात, तातूंत लोक मेल्यात, जखमी जाल्यात. वाहनांचेंय लुकसाण जालां. आतां फुडल्या दोन म्हयन्यांत, म्हणल्यार मीर्ग लागचे पयलीं 100 टक्के काम पुराय जातलें, अशी खात्री कंपनी, म्हापालिका, सरकार… सगल्यांनीच उक्तायल्या. पणजे कडेन संबंद आशिल्ले सगले लोक 31 मेची वाट पळयतात आसतले.
तारीख पे तारीख जाहीर जायत आसा. आतां ही निमाणी तारीख थारूं दी. हालींच काकुलो माॅल जंक्शन ते विवांता जंक्शना मेरेनचो रस्तो काँक्रिटाचो करपाचो आशिल्ल्यान तो बंद करतले आनी हें काम 30 एप्रील मेरेन पूर्ण जातलें, अशें इमॅजीन पणजी कंपनीन म्हणिल्लें. मात, काल तांचेच सीईओ म्हणटात, 31 मे मेरेन रस्त्याचें काम जातलें. गडबडींत तांच्या तोंडांतल्यान 30 एप्रीला बदला 31 मे जालें काय खरेंच दोन म्हयन्यांचो काळ लागतलो, तें कळना. रस्तो पूर्ण बंद करतले अशें जाहीर जाल्लें. पूण, थंयच्यान दुचाकी आनी चारचाकीय वतात, येतात. फाटले फावटूय रस्तो बंद केल्लो, पूण तो कागदार. प्रत्यक्षांत येरादारी चालूच आशिल्ली. गाडयेकारांचोय नाईलाज. ते तरी बाबडे कितें करतले? ह्या मार्गाचेर हाॅटेलां, दुकानां आसात. तांकां दोन म्हयन्यां भितर काम जावं दी म्हूण देव उदकांत बुडोवन बसचें पडटलें. मुळांत तांचें अर्द्या परस चड गिरायक आतांच देंवलां. हो पुराय रस्तोय केबल घालपाक, अंडरग्रावंड गटार बांदपाक, सिवरेज लायन घालपाक बरेच फावटी फोडलो, माती उडोवन दुरुस्त केलो. परत फोडलो…….!!
स्मार्ट सिटी ही मुळांत केंद्र सरकाराची येवजण. ते खातीर करोडांनी रुपया संबंदीत राज्यांक दिल्ले. कांय शारांचीं कामां पुराय जाल्यांत. तर पणजे सारक्या कांय ल्हान शारांचीं अजून चलतात. सुरवातेचें वर्सभर तर कांयच काम जाल्लें दिसूंक ना. मागीर हो दुडू परत केंद्राक वतलो अशें जाहीर जालें आनी कितें सांगचें सायबा… धडाधड खणकाम सुरू जालें. शारांत हांगा खणटा म्हणसर थंय खणटात. पणजेचीं सध्या चलतात तींच कामां देडशे कोटी रुपयांची खंय. तीं इतलीं दर्जेदार की फुडलीं 20 वर्सां तांकां परत हात पसून लावपाची गरज पडची ना, अशी गॅरंटी स्मार्ट सिटी अधिकाऱ्यांनी, राजकी फुडाऱ्यांनी दिल्या. तांचो दावो खरो थारूं.
हें काम 31 मे मेरेन पूर्ण जावं. येरादारी (आतां शारांत बसी सुरू जावपाच्यो आसात.) जाग्यार पडपाची आसा. आख्ख्या शारांतले रस्ते हाॅटमिक्स पद्दतीन डांबरी करपाचे आसात. थोडे काँक्रिटाचे जातले. लोकांची पार्किंगेची तजवीज जावपाची आसा. फळां विकपी, गाडेकार, ल्हान वेवसाय करप्यांक तांचो वेवसाय परत सुरू करपाचो आसा. उदरगत ही जायच, पूण ते खातीर कितलीं वर्सां मनस्ताप सोंसपाचो हाका धरबंद जाय. पणजी स्मार्ट जावं वा ना जावं, पूण हीं सध्या चलिल्लीं कामां बेगीन सोंपू, इतलेंच सगले मागतात आसतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
