भांगरभूंय | प्रतिनिधी
वास्को, प्रतिनिधी: कॉंग्रेस हाय कमांडान चिखलेच्या कॅप्टन विरेयतो फर्नांडीस हांकां दक्षीण गोंयच्यान लोकसभे खातीर उमेदवारी दिवची अशी मागणी कांय कॉंग्रेस फुडार्यांनी केल्या. संसदेंत गोंयचे प्रस्न प्रभावीपणान मांडपाक कॅप्टन फर्नांडीस हे योग्य उमेदवार आशिल्ल्याची प्रतिक्रिया तांणी ह्या वेळार उक्तायली.
विरेयतो फर्नांडीस हांची चिखलेचे आदले सरपंच सेबी डिसौझा तशेंच हेरांनी भेट घेतली. त्या वेळार तांणी ही प्रतिक्रिया दिली. तशेंच कॉंग्रेसीचे एक फुडारी ओलंसियो सिमोईस हांणी गांवांतले, गोंयचे मुद्दे योग्य तरेन मांडपा खातीर कॅप्टन फर्नांडीस हांणी गरज आशिल्ल्याचें सांगलें.
कोळसो प्रदूषण, येरादारी, रेलमार्ग दोट्टीकरण, बेरोजगारी,पर्यावरण आनी हेर प्रस्नां खातीर ते सेगीत आवाज करतात. ताका लागून तांचें लोकां मदीं एक बरें चित्र निर्माण जालां. तांकां कॉंग्रेस पक्षान तिकेट दिवची अशी मागणी ह्या थळाव्या फुडाऱ्यांनी केल्या.
चिखलेचे आदले सरपंच राऊल परेरा हांणी कॉंग्रेसींतले कांय भाजपा एजंट कॉंग्रेसची वाट लावपाचो यत्न करतात असो दावो केला. फ्रान्सिस्को सार्दिन हांकां परत उमेदवारी दिल्यार ते जिखपाक शकनात. ते जाण्टे जाल्यात. गिरिश चोडणकार हांकां तिकेट दिल्यार ते कशेच जिखचे नात. कॅप्टन फर्नांडीस हे योग्य उमेदवार जावन आसात. सेटींग करप्यांक उमेदवारी दिल्यार आमी पक्षाचे राजिनामे दितले, अशी शिटकावणी तांणी ह्या वेळार दिली.
क्रिस्टोडियो डिसौझा हांणीय नुस्तेमार भावांचो कॅप्टन फर्नांडीस हांकां पुराय तेंको आशिल्ल्याचें सांगलें. आदले लोकसभा वेंचणुकेंत कॉंग्रेसचो जो उमेदवार जिकिल्लो तांणी वास्कोंत पांय लेगीत दवरूंक नाशिल्लो असो दावो तांणी केलो. केळशी पंचायतीच्या एका पंचानूय कॅप्टन फर्नांडीस हे योग्य आनी अभ्यासक व्यक्ती आशिल्ल्याचें सांगून तांकां उमेदवारी दिवची अशें ह्या प्रतिनिधीक सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
