भांगरभूंय | प्रतिनिधी
नवी दिल्ली, खबरां संस्था: फाटल्या म्हयन्या सावन देशभर इलॅक्टोरल बॉण्ड्सचेर चर्चा चल्ल्या. सर्वोच्च न्यायालयान शिटकायल्या उपरांत भारतीय स्टेट बँकेन विकिल्ल्या आनी उपरांत राजकीय पक्षांनी वाटिल्ल्या इलेक्टोरल बॉण्ड्सचो सगळो तपशील वेंचणूक आयोगाक दिलो. उपरांत इलेक्टोरल बॉण्डान हो तपशील आपले वेबसायटीचेर घालो. ह्या तपशीला प्रमाण २०१९ वर्साचे वेंचणुके वेळार चडशे बॉण्ड रिडीम केल्ले अशें उजवाडाक आयलां. देखून विरोधी पक्षांनी भारतीय जनता पक्षाचेर टिका करपाक सुरवात केल्या. कांय भाजप फुडार्यांनी हे टिकेक जाप दिली जाल्यार कांय ओगी रावले. प्रधानमंत्री नरेंद्र मोदी हांणी फाटल्या कांय दिसांनी हे विशीं कांयच सांगूंक ना. मात प्रधानमंत्र्यांनी हे विशीं टिप्पणी केल्या.
‘इलेक्टोरल बॉण्ड्सांचेर टिका करतात, हाचो विरोध करतात वा ताचेर गोंदळ निर्माण करतात, त्या लोकांक एक दीस पश्चाताप जातलो अशें मोदी हांणी सांगलें.
प्रधानमंत्री नरेंद्र मोदी हांणी सांगलें, ‘२०१४ मेरेन देशाची परिस्थिती सामकी गंभीर आशिल्ली. कारण राजकी पक्षांक निधी कोण दिता? तांचे कडेन इतले पयशे खंयच्यान येतात? हे विशीं लोकांक कसलीच म्हायती मेळनाशिल्ली. मात, इलेक्टोरल बॉण्डाक लागून देशांतले जनतेक राजकी पक्षांक मेळपी निधी विशीं म्हायती मेळपाक लागली. पयशे खंयच्यान आयले, कोणाक मेळ्ळे अश्या प्रस्नांच्यो जापो आतां मेळटात. म्हाका अशें दिसता, खंयचीच वेवस्था सुरवातेक पूर्ण नासता. तांतल्यो चुको सुदारून उपरांत ती वेवस्था सारकी करूं येता.’
भाजपाक सगळ्यांत चड बॉण्ड्स
वेंचणूक आयोगाचे वेबसायटीचेर मेळिल्ले म्हायती प्रमाण, १२ एप्रील २०१९ ते १५ फेब्रुवारी २०२४ ह्या काळांत एसबीआयन २२ हजार २१७ इलेक्टोरल बॉण्ड विकले. तातूंतले चडशे म्हळ्यार ८ हजार ६३३ इलेक्टोरल बॉण्ड (४६.७४%) फकत भाजपाक दिल्यात. तशेंच फाटल्या पांच वर्सांत वट्ट १२ हजार ७६९ कोटी इलेक्टोरल बॉण्ड वठयल्यात. तातूंतले अर्द्या परस चड म्हळ्यार ६ हजार ०६० कोटी मोलाचे बॉण्ड फकत भाजपान वठयल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
