भांगरभूंय | प्रतिनिधी
हालींच गोंयचे मुख्यमंत्री डाॅ. प्रमोद सावंत हांणी दक्षीण गोंयांत वैजकी काॅलेज जातलें, अशी घोशणा केली. आचारसंहिता सोंपले उपरांत ताचें काम सुरू जावं येता. गोंयांत एकूच वैजकी काॅलेज आशिल्ल्यान थंय सुवाती मर्यादीत आात. ताका लागून प्रवेश मेळूंक नाशिल्ल्यांक गोंयां भायर वचून चड पयशे दिवन दोतोर जावपाचें सपन पुराय करचें पडटा. कांय विद्यार्थी देशा भायर पसून वतात. हें कितें सगल्यांक शक्य नासता. म्हूण दक्षीण गोंयांत आनीक एक काॅलेज जावप गरजेचें. मात हांगा प्रवेश घेवपाक नीट परिक्षा पास जावपाक जाय. गोंय प्रवेश परिक्षा खूब वर्सां पयलीं बंद जाल्या. नीट परिक्षेची तयारी बेगीन करीत जाल्यार बरी. हें युग सर्तीचें. ताका लागून तुमी एका विशयांत तरी कुशळटाय मेळोवपाक जाय. अशा जाग्या खातीर काम करपाक जाय, जंय सर्त उणी आसतली आनी मागणी चड आसतली.
गोड्या मुताचे दुयेंती खूब मेळटत. हे बाबतींत अहमदनगरचो दोतोर सुबोध देशमुख बरें काम करता. ताणें होमियोपॅथीचो अभ्यास केला. मागीर आहाराचो डिप्लोमा केला. पुण्याचे दोतोर प्रमोद त्रिपाठी हांच्या मार्गदर्शना खाला तांणी आपलें काम सुरू केल्लें. गोंयांतले कांय दोतोरुय त्रिपाठी हांचें मार्गदर्शन घेतात. देशमुख दोतोर होमियोपॅथी शिकलो तेन्ना नीट परिक्षा नासली, तरीय खूब अभ्यास करून दोतोर जावपाचें सपन तांणी पुराय केलें. ते म्हणटात, विज्ञान फांट्यान वचपाक विद्यार्थ्यान शाळेंत आसतनाच विज्ञान फांट्याच्या अभ्यासाचेर लक्ष केंद्रीत करपाक जाय. हातूंत जायत्या करियरांची संद आसा, हें खरें. पूण सातत्यान शिकप, खूब- खूब मेहनत
घेवन अभ्यास करप गरजेचें आसा. आदले पेपर वेबसायटीचेर वाचूंक मेळटात. ते सोडोवपाची संवय लावन घेवपाक जाय. हें करतना घडयाळ मुखार दवरून अमक्या प्रस्नाक कितलो
वेळ लागता हाचेर लक्ष दवरपाचो यत्न करूंक जाय. मागीर तुमकां अमके प्रस्न बरोवपाक वेळ मेळूंक ना ही कागाळ करपाची गरज उरची ना.
ह्या फांट्यांत फिजिक्स, केमिस्ट्री, गणित, बायोलाॅजी सारकी विशय म्हत्वाचे आसा. पूण दोतोर फांटो जर घेतलो तर गणित विशय हो जरी तितली म्हत्वाचो नासलो तरी पूण नीट परिक्षा
तितलीच म्हत्वाची जाल्या. हाची तयारी शाळे सावनूच करात. प्रस्नपत्रिकेचो जाता तसो सराव करात. तुमच्या शिक्षकाक दाखयात. जें सर्वसादारण लोक करतात, तें करपाक वचूं नाकात. जशे एमबीबीएस सगले जरी जाले, तरी तुमी सर्जन जावपाचें सपन पळयात. वेगळी वाट माड्डियात.
आयच्या सर्तीच्या काळांत सर्जन तातूंतल्या तातूंत कठीण फांट्यांत वचपी थोडेच विद्यार्थी आसतात. हांवें होमियोपॅथीक फांटो घेतलो, पूण डाॅ. त्रिपाठीच्या मार्गदर्शना खाला गोड्या मुताचेर लक्ष दिवपाक लागलों. हाचेर खातीर आहार तज्ञ जावपाचो डिप्लोमा केलो. जायते दुयेंती ते खातीर बरे जावंक पावले. दोतोर देशमुख हांणी हाचेर जायत्यो कार्यशाळा, लेख, भाशणां दिल्यात. ह्या फांट्यांत वचपाक जे वचपाक सोदतात, तांणी सद्दां अभ्यास करप, सराव करप गरजेचें. ह्या फांट्यांत वचपाचें आसा जाल्यार खंयच्या विशयाचेर तुमकां भर दिवपाक जाय, ताची म्हायती पयलींच घेवची. ते खातीर https://neet.nta.nic.in संकेतथळाचेर वचूं येता. चड म्हायती खातीर दोतोराक (9822366371) फोन करूं येता.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
