काँग्रेसीन साठ वर्सां जनतेक लुटले, आतां तांणी आपलें दुकान बंद करचें : मुख्यमंत्री
भांगरभूंय | प्रतिनिधी
दिवचल, प्रतिनिधी: काँग्रेसीन फाटलीं साठ वर्सां जनतेक लुट लूट लुटले. आतां तांणी आपलें दुकान बंद करचें. कारण येवपी 25 वर्सां भारतीय जनता पक्षाचे सरकार देशांत कायम उरतलें. काँग्रेसी कडेन साठ वर्सांत जीं कामां जावंक नात तीं मोदीजींनी फक्त धा वर्सांनी करून संवसारीक पांवड्यार भारताचो दर्जो वाडयला. येवपी काळांतूय परत मोदी सरकारुच सत्तेर येतलें. गोंयांत दोनूय जाग्यांचेर भाजपाकूच जैतीवंत करचें असो उलो मुख्यमंत्री डॉ. प्रमोद सावंत हांणी मारलो.
उत्तर गोंय भाजप उमेदवार श्रीपाद नायक हांचे हाजेरींत सांखळे मतदारसंघातल्या सगळ्या पंचायत विभागांत देवदर्शन, बसका तशेंच संपर्क अभियान राबयलें. ह्या वेळार नगराध्यक्ष रश्मी देसाय, उपनगराध्यक्ष आनंद काणेकार, सगळे नगरसेवक, सरपंच कालिदास गांवस, कृष्णा गांवस, राजन फाळकार, संजय नायक, गोपाळ सुर्लकार तशेंच भाजपचे पदाधिकारी, कार्यकर्ते हाजीर आशिल्ले.
सांखळे आयटी प्रकल्प उबारतले
सांखळे मतदारसंघांत आधुनीक सुविधा उपलब्ध केल्यात. सांखळे वा हरवळ्यां कोमुनिदाद वा हेरांनी जागो उपलब्ध करून दिल्यार आयटी प्रकल्प उबारपाक सगळे तरेचे यत्न करतलों अशी म्हायती मुख्यमंत्र्यान दिली.
केंद्रीय मंत्री श्रीपाद नायक हांणी, पंचवीस वर्सां जनतेक साथ दिली. मजगतीं जायत्यो येवजण्यो चालीक लायल्यो. शिक्षण, भलायकी सुविधां वांगडा खुबशे प्रकल्प राबोवपाची तांकां संद मेळ्ळी. राजकारण समाज साधनेचें एक मुखेल साधन. ताका लागून परत पक्षान दिल्ली जापसालदारकी पुराय करपाक आपूण सक्रीय जालां. जनतेन साथ दिवची, असो उलो तांणी मारलो.
राहुल गांधींक उक्तें आव्हान
राहुल गांधी भाजपाचेर फटींग आरोप करीत सुटला. मांत तांणी काँग्रेसीन फाटलीं साठ वर्सां नेमकें कितें केलें हें दाखोवन दिवचें. हांव तांकां उक्तें आव्हान दितां. अशें मुख्यमंत्र्यान म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
