भांगरभूंय | प्रतिनिधी
पणजी, बातमीदार : बांबोळे एके गाडयेक अपघात जावन चालकाक मरण आयलें. ही घडणूक शेनवारा रातची घडली. मडगांवच्यान पणजे भोंवपा खातीर येतना हे गाडयेक अपघात जालो. गाडयेंत तीग जाण आशिल्ले. हातूंत गाडी चालक उस्मान खान (२०, आकें-मडगांव) हाका मरण आयलें. तशेंच गाडयेंत आशिल्ले ताचे हेर दोग इश्ट जखमी जाल्यात.
उस्मान आपल्या दोगांय इश्टां सयत पणजे भोंवपा खातीर येतालो. येतना वाटेक तांचेर काळान घालो घातलो. बांबोळे सीबीआय कार्यालया कडेन पावतांच चालक उस्मान हाचो गाडये वयलो ताबो वचून तांणी मुखारच्यान येवपी टॅम्पोक धपको दिलो. हातूंत उस्मानाक मरण आयलें आनी ताचे दोगूय इश्ट जखमी आसात. ही घडणूक रातच्या २ वरांचेर घडली.
ह्या अपघाताची म्हायती पुलीस नियंत्रण कक्षाक मेळटांच आयपीएस सुलेखा जगरवार आनी निरीक्षक अनंत गांवकार हांच्या मार्गदर्शना खाला हवालदार प्रशांत नायक आनी हेर पुलीस घडणुके सुवातेर पावले. उपरांत १०८ ऍम्बुलन्सूय घडणुके सुवातेर दाखल जाली. जखमी जाल्लो गाडयेचो चालक उस्मान खान आनी ताच्या दोगांय इश्टांक बांबोळे गोमेकोंत उपचारा खातीर व्हेले. मात उस्मानाक उपचारा पयलींच मरण आयिल्ल्याचें दोतोरांनी सांगलें. ताच्या इश्टाक बारीक दुखापत जाल्ल्यान तांचेर उपचार करून तांकां डिस्चार्ज दिलो. उस्मानाचे कुडीचेर पोस्टमार्टम करून आयतारा सकाळीं ताची कूड कुटुंबाचे सुवादीन केली.
मजगतीं, आगशीचे पुलीस हवालदार प्रशांत नायक हांणी अपघाताचो पंचनामो करून दोनूय वाहनां कुशीक केलीं. फुडलो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
