भांगरभूंय | प्रतिनिधी
म्हापशें, प्रतिनिधी ः फाटले विधानसभा वेंचणुके वेळार मतदारांक आकर्शीत करपा खातीर करासवाड्यार फ्लायओव्हराचेर आपल्या पक्षाचें चिन्न आशिल्ले जायरात बोर्ड लावन भौशीक मालमत्ता बुरशी करपाच्या आरोपांतल्यान आम आदमी पक्षाचे तेन्नाचे उमेदवार आनी फुडारी राहुल म्हांबरे हांची निर्दोश मुक्ताता जाल्या. हे संबंदी म्हापश्यांच्या पयल्या वर्गाच्या न्यायालयान निकाल दिलो.
हो गुन्यांव राहुल म्हांबरे आड म्हापश्यां पुलिसांनी पीडीपीपी कायद्याच्या कलम 3 खाला 16 डिसेंबर 2022 दिसा नोंद केल्लो. ते उपरांत पुलिसांनी न्यायालयांत आरोपपत्र दाखल केलें. हे प्रकरणाचे सुनावणे वेळार न्यायालयान म्हांबरे हांची निर्दोश सुटका केली.
मजगतीं, फाटल्या 2022 वर्सा जाल्ले विधानसभा वेंचणुके वेळार आम आदमी पार्टी आनी तृणमूल काँग्रेसीन राष्ट्रीय म्हामार्गाच्या फ्लायओव्हराच्या वण्टीचेर आनी हेर भौशीक सुवातींनी पक्षाचें चिन्न आशिल्लें पोस्टर रंगयल्लें आनी तांणी आपल्या पक्षाचो प्रचार केल्लो. वेंचणुक जावन बऱ्याच काळा उपरांत लेगीत संबंदीत पक्षांनी आनी तांच्या उमेदवारांनी पोस्टर काडले नात. करासवाडो फ्लायओव्हर, नास्नोळा सर्कल, नास्नोळा क्लब, उसकय हांगाच्या जागबाय जंक्शन, म्हापश्यांतल्या तार फ्लायओव्हर आनी हळदोणा मतदारसंघांतल्या वाठारांनी पोस्टर लायिल्ल्यान आप उमेदवार आनी अज्ञातां आड गुन्यांव नोंद केल्ले. ते भायर उत्तर गोंय पुलिसांनी आम आदमी पार्टी आनी तृणमूल काँग्रेस पक्षा आड वट्ट 13 गुन्यांव नोंद केल्ले. हे गुन्यांव पणजी, पोरणें गोंय, म्हापशें, कोलवाळ आनी पेडणें पुलिशेंत नोंद केल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
