भांगरभूंय | प्रतिनिधी
नवी दिल्ली, खबरां संस्था ः अंदूं जानेवारी ते मार्च ह्या तिमाळ्यांत देशांतल्या आठ महानगरांत नव्या घरांची पुरवण उणी जाल्ल्याची नोंद जाल्या. पयले तिमाहींत 69 हजार 143 नव्या घरांची पुरवण जाल्ली. ती फाटल्या वर्साच्या पयल्या तिमाही परस 15 टक्क्यांनी उणी आसा.
बांदकाम मळा वयल्या कुशमॅन अँड वेकफील्ड हे सल्लागार संस्थेन देशांतल्या आठ महानगरांतल्या मालमत्ता मळा विशीं तिमाही अहवाल जाहीर केला. ते प्रमाण बेंगळूरु आनी मुंबय शारांनी नव्या घरांची पुरवण वाडल्या. पूण दिल्ली, चेन्नय, हैदराबाद, पुणे, कोलकाता आनी अहमदाबाद हांगां नव्या घरांची पुरवण उणी जाल्या. पयल्या तिमाहींत नव्यान सुरू केल्ल्या घरां बांदपाच्या प्रकल्पांतले 34 टक्के प्रकल्प लक्झरी घरांचे आसात.
अंदूं पयल्या तिमाहींत 69 हजार 143 नव्या घरांची पुरवण जाल्या. फाटल्या वर्सा पयल्या तिमाहींत हो आंकडो 81 हजार 167 आशिल्लो. बेंगळुरूंत नव्या घरांची पुरवण 7 हजार 777 वयल्यान 8 हजार 848 जाल्या. तशेंच मुंबयंत नव्या घरांची पुरवण 19 हजार 63 वयल्यान 19 हजार 461 जाल्या. पुण्यांत फाटल्या वर्सा नव्या घरांची पुरवण 13 हजार 806 आशिल्ली. अंदूं पयल्या तिमाहींत 11 हजार 358 मेरेन देंवली. अहमदाबादांत फाटल्या वर्साच्या पयल्या तिमाहींत नव्या घरांची पुरवण 4 हजार 901 आशिल्ली, अंदूं पयल्या तिमाहींत ती 4 हजार 529 मेरेन देंवल्या. चेन्नयत नव्या घरांची पुरवण 8 हजार 144 वयल्यान 5 हजार 490 जाल्या, जाल्यार दिल्लींत 7 हजार 813 वयल्यान 3 हजार 614 जाल्या अशें अहवालांत नमूद केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
