भांगरभूंय | प्रतिनिधी
मडगांव, प्रतिनिधी ः गोयांतले काय सुवार्थी पाद्री भाजपा वांगडा आसात. पूण सर्वधर्मसमभाव मानपी हेर सगळे धर्मगुरू भाजपा आड आसात. काय आप, टीएमसी बरोबर आसतले, पुण काँग्रेसी विरोधांत कोण नात. तांचो फकत भाजपाकच विरोध आसा. ते भारताचे विविधतायेंत एकवट मानतात. भाजपाची हिंदुत्त्व संकल्पना ते मानीनात असो दावो दक्षीण गोंयचे सध्याचे काँग्रेसीचे खासदार फ्रान्सिस सार्दिन हांणी केला.
खासदार सार्दिन हांणी आयज पत्रकार परिशद घेवन भाजपाचेर टिका केली. हे खेपे तांणी वयलो दावो केला. निमाणे वेळार लोकसभेचे वेंचणुकेंत उबो रावपाची संद मेळची अशी मागणी पक्षाक केल्या. पूण, उमेदवारी कोणाक दिवप हो पक्षाचो निर्णय आसता. राजकारणांत हांव नवो न्हय आनी हांव तत्वांचेर चलपी मनीस. म्हाका कोणूय विकतें घेवंक शकनात अशेंय तांणी ह्या वेळार सांगलें.
भ्रश्टाचाराच्या आरोपांत देशांतल्या दोन मुख्यमंत्र्यांक बंदखणींत दवरल्यात. दर एका कामांत कमिशन घेतिल्ल्यान कर्नाटकांतलें भाजपा सरकार पडलें. भाजपान भ्रश्टाचार कायदेशीर केला. केंद्रीय तपास एजन्सींक विरोधी पक्षां फाटल्यान दवरून तांकां ओगी करतात. भाजपान आमदार विकतें घेतले. पूण, मतदार थंयच आसात. कांय जाणांक खटल्यांचो भंय दाखोवन तर कांय जाणांक पयशे दिवन विकतें घेतले. महाराष्ट्रांत अजीत पवार हांचेर 70 हजार कोटींचे भानगडीचो आरोप केलो. आतां भाजपान ताका आपल्या पक्षा वांगडा घेवन उपमुख्यमंत्री केला. हें भाजपाचें धोरण अशें खासदार सार्दिन हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
