भांगरभूंय | प्रतिनिधी
मडगांव पुलिशेंत गुन्यांव नोंद
मडगांव, प्रतिनिधी ः आल्त मडगांवच्या एल्विस बार्रेटोच्या इश्टाचे ऑस्कर फर्नांडीसाच्या नांवान बनावट फेसबूक खातें तयार करून पयश्यांची मागणी करपाचो प्रकार घडलो. ‘गुगल पे’ वरवीं बार्रेटोन 75 हजार रुपया फारीक केल्या उपरांत ही फटवणूक ताच्या लक्षांत आयली. उपरांत बार्रेटोन दुबावीत अभिषेक खत्री आड मडगांव पुलिशेंत कागाळ दाखल केल्या उपरांत गुन्यांव नोंद करून तपास सुरू आसा.
अभिषेक खत्री नांवाच्या मनशान कागाळदार एल्विस बार्रेटोचो इश्ट ऑस्कर पीटर फर्नांडीस हाच्या नांवान बनावट फेसबूक खातें तयार केलें. त्या अकाउंट वरवीं बार्रेटो फ्रेन्ड रिक्वेस्ट धाडली आनी ती मान्य केले उपरांत ताणें त्या फेसबूक अकाउंटच्या मेसेंजर अॅपा वरवीं पयश्यांची गरज आसा अशें सांगून पयशे धाडपाची मागणी केली. इश्टाक पयशांची गरज आसा अशें समजून एल्विस बार्रेटोन आपल्या स्टेट बँक ऑफ इंडियाच्या मडगांव शाखेच्या खात्यांतल्यान ‘गुगल पे’ वरवीं 75 हजार रुपया ट्रान्सफर केले. उल्लेख केल्ले पयशे रोहतक (हरयाणा) हांगाच्या सरब्रा हरयाणा ग्रामीण बँकेच्या खात्यांत जमा जाले. ही पयशांची मागणी 1 जानेवारीक घडिल्ली. मदल्या काळांत एल्विस बार्रेटोक कळ्ळें की ताणें आपलो इश्ट ऑस्कर फर्नांडीस अशें समजून चुकीच्या मनशाक पयशे धाडले. अर्थीक फटवणूक जाल्ल्याचे कळ्ळ्या उपरांत आतां एल्विस बार्रेटो हांणी दुबावीत अभिषेक खत्री हाचे आड मडगांव पुलिशेंत कागाळ दाखल केल्या. मडगांव पुलिसांनी फटवणूकीचो गुन्यांव नोंद केला. हे प्रकरणांत पुलीस निरिक्षक तुळशीदास नायक हांच्या मार्गदर्शना खाला पुलीस उपनिरिक्षक निलेश शिरवईकार फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
