भांगरभूंय | प्रतिनिधी
नवी दिल्ली, खबरां संस्था ः राष्ट्रपती द्रौपदी मुर्मू हांणी शेनवारा चार जाणांक देशांतलो सगळ्यांत व्हडलो नागरी पुरस्कार ‘भारत रत्न’ मरणोत्तर दिवन भोवमान केलो. हातूंत आदले प्रधानमंत्री चौधरी चरण सिंह, पी.व्ही. नरसिंह राव, बिहाराचे आदले मुख्यमंत्री कर्पूरी ठाकुर आनी शेतकी शास्त्रज्ञ डॉ. एम.एस. स्वामीनाथन हांचो आस्पाव आसा. राष्ट्रपतीन हो भोवमान तांच्या कुटुंबाक भेटयलो. फाल्यां (ता. 31) भाजपाचे वरिश्ठ फुडारी लालकृष्ण आडवाणी हांचो भोवमान जातलो.
भलायकेक लागून आयज राष्ट्रपती भवनांत जाल्ल्या सन्मान सुवाळ्याक भाजपाचे वरिश्ठ फुडारी लालकृष्ण अडवाणी हाजीर रावूंक शकले नात. देखून राष्ट्रपती 31 मार्चाक फाल्या तांच्या घरा भेट दिवन तांकां हो भोवमान दितले.
केंद्र सरकारान अंदूं 5 जाणांक ‘भारत रत्न’ पुरस्कार दिवपाची घोशणा केल्ली. मदन मोहन मालवीय, अटलबिहारी वाजपेयी, प्रणव मुखर्जी, भूपेन हजारिका आनी नानाजी देशमुख हांकां मोदींच्या कार्यकाळांत हो भोवमान मेळिल्लो. हे खेपे हो पुरस्कार 5 जाणांक दिला. हाका लागून आतां मेरेन हो भोवमान मेळोवप्यांचो आंकडो 53 जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
