भांगरभूंय | प्रतिनिधी
नवी दिल्ली, खबरां संस्था ः 18 व्या लोकसभेची वेंचणूक 19 एप्रील सावन सुरू जाता. आचारसंहितेचें उल्लंघन करपा आड ‘सी-व्हिजिल’ ॲप खूब फायद्याचो जाला. लोकसभा वेंचणूक जाहीर जायत सावन देशभरांतल्यान 79 हजारां परस चड कागाळी केंद्रीय वेंचणूक आयोगा कडेन नोंद जाल्यात. तांतूतल्यो जायत्यो कागाळी बेगोबेग सुटाव्योय केल्यात.
आयोगाक मेळिल्ल्यो 99 टक्क्यां परस चड कागाळीं सुटाव्यो जाल्यात आनी 89 टक्के कागाळीं 100 मिनटां भितर सुटाव्यो जाल्यात.
बेकायदेशीर होर्डिंग आनी बॅनरां आड 58 हजारां (73 टक्के) परस चड कागाळी नोंद जाल्यात. पयशे, भेटवस्तू आनी सोरो वांटपा विशीं 1400 परस चड कागाळी आयोगा कडेन आयल्यात. 2 हजार 454 म्हळ्यार सुमार ३ टक्के कागाळी मालमत्तेच्या विद्रूपताय कडेन संबंदीत आसात. बंदूक दाखोवप आनी धमकी संबंदी कागाळीय आयोगांत नोंद जाल्यात. जाल्यार 535 कागाळीं मदल्यो 529 कागाळी सुटाव्यो जाल्यात. थारयल्ल्या वेळा उपरांत स्पीकर्स वापरून प्रचार करपा आड एक हजार कागाळी आसात अशें केंद्रीय वेंचणूक आयोगान स्पश्ट केलें.
लोकसभा वेंचणूकेच्यो तारखो जाहीर जाले उपरांत मुखेल वेंचणूक आयुक्त राजीव कुमार हांणी मतदारांनी सी-व्हिजिल ॲप वापरचो, जंय लोकांक वेंचणुके संबंदीत कागाळी नोंद करपाक मेळटल्यो असो उलो मारिल्लो. ह्या ॲपा वरवीं लोक आपल्या वाठारांतल्या जिल्लो नियंत्रण कक्ष, वेंचणूक अधिकारी, जागृताय अधिकारी आनी जागृताय पंगडा कडेन संपर्क करुंक शकतात.
हो ॲप वापरून नागरिकांक राजकी गैरवेव्हाराच्यो घडणुको मिनटां भितर कळोवंक मेळटात. ते खातीर वेंचणूक अधिकाऱ्याच्या कार्यालयांत वचपाची गरज ना. सी- व्हिजिल ॲपाचेर कागाळ धाडले बरोबर कागाळदाराक एक युनिक आयडी मेळटलो, जाचे वरवीं कागाळदार कागाळ सुटावी जाल्या काय ना तें मोबायलाचेर तपासूंक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
