भांगरभूंय | प्रतिनिधी
मडगांव: फातर्प्यां श्रीशांतादुर्गा फातर्पेकान्ना संस्थानाचो तोपशोत्सव, गुलालोत्सव शुक्रारा व्हड उमेदीन मनयलो.
फातर्प्यां श्रीशांतादुर्गा फातर्पेकान्न संस्थानाचो गुलालोत्सवा निमतान सकाळीं विवीध धर्मीक विधी जाले. पालखी देवळांतल्यान सजोवन श्रींची मुर्ती तातूंत विराजमान केली. देवीक गुलाल अर्पण केले उपरांत भाविकांनी एकामेकांक गुलाल लावपाक सुरवात केली. सांजवेळा चार वरांचेर धोल, ताश्यांच्या गजरात रंगीत फुलांनी, खणांनी सजयिल्ल्या पांच ‘तोपशा’ नाचयत श्रींची पालखी मिरवणुकेक सुरवात जाली.
पालखी परंपरीक वाटेन वचत ‘पान्नात’ ह्या परंपरीक सुवातेर पावली. थंय रचून दवरिल्ल्या तणाक (होळयेक) उजो लायलो. हाजीर आशिल्ले भावीक त्या होळये वेल्यान उडयो मारून आनी होळयेची विभुती कपलाक लावन मुखार गेले. पालखेकूय होळये वेल्यान व्हेली. उपरांत पालखी मिरवणूक काडीत भाविकांक देवीचें दर्शन दितात. ह्या वेळार व्हंट भरपाक, तशेंच कुंकू अर्पण करपाक बायलां वांटेकार जाल्ल्यो. मिरवणुके उपरांत पालखी परतून देवळां हाडली आनी आरती प्रसाद जाले उपरांत ह्या उत्सवाची सांगता जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
