भांगरभूंय | प्रतिनिधी
मडगांव: फेब्रुवारी म्हयन्यांत चेन्नयंतल्याे सुमार 15 शाळा आनी म्हाविद्यालयां बॉम्बान उडोवपाच्या धमकीचे ईमेल आयले उपरांत आस्थापनां बंद दवरून तपासणी केल्ली. हातूंतले कांय मेल्स गोंयचे आशिल्ल्यान चेन्नय पुलीस मडगांवां पांच तरणाट्यांचे चवकशे खातीर आयिल्ले.
मेळिल्ले म्हायती प्रमाण चेन्नयचो पुलीस पंगड तपासा खातीर गोंयांत दाखल जाल्लो. चेन्नायंतल्यो सुमार 15 शाळा, म्हाविद्यालयांच्या ईमेलीचेर बॉम्बस्फोट करून आस्थापनां उडोवन दिवपाची धमकी ईमेला वरवीं दिल्ली. उपरांत पुलीस प्रशासना कडल्यान शाळा आनी म्हाविद्यालयां बंद दवरून बॉम्ब स्कॉडाचे मजतीन आस्थापनांची तपासणीय केली. त्या काळांत शाळा आनी म्हाविद्यालयां बंद दवरिल्लीं.
चेन्नयंतल्यान गोंयांत आयिल्ल्या पुलिसांच्या पंगडांत सायबर क्रायमाचे तज्ञ आसात. तांचे कडेन मेल्साच्या आयपी अॅड्रेसा वयल्यान मेळिल्ल्या पांच जाणांची नांवां आशिल्लीं. ते प्रमाण तांणी चवकशी करपाक सुरवात केली. दुबावितां कडले मोबायल, संगणक हेर इलेक्ट्राॉनिक्स वस्तूंची तपासणी करतले आनी तांची चवकशी करतले.
गोंयांतल्या पांच मनशांचीं नांवां ईमेल धाडप्यां मदीं आशिल्ल्यान तपासकामाचो एक भाग म्हूण हो पंगड गोंयांत दाखल जाला. मडगांवां सयत गोंयांत चार-पांच सुवातांनी भेट दिवन तपास करतात. बॉम्बस्फोट प्रकरणांत धमकीचे ईमेल्स धाडटना अद्ययावत तंत्रज्ञानाचो वापर करून दुसऱ्या ठिकाणा वल्यान गोंयांतल्या मनशांचो आयपी अॅड्रेस वापरून हो गुन्यांव केल्ल्याची शक्यताय लेगीत आसा.
तामीळनाडूंतल्यो शाळा बॉम्बान उडोवन दिवपी ईमेल गोंयच्यान धाडिल्ल्यान गोंयची पुलीस यंत्रणाय गोंदळून गेल्या. गोंयांत आयज मेरेन असो प्रकार केन्नाच घडिल्लो ना. पूण गोंयच्या मनशांच्या मोबायलाच्या क्रमांकाचो वापर करून प्रगत म्हायती तंत्रज्ञानाचो वापर करून हेर कोणेय ईमेल धाडला आसुये अशी शक्यताय पुलिसांनी उक्तायली.
गोंयां सयत आनिकूय कांय राज्यांतल्या मनशां कडल्यान ईमेल आयिल्ले आसून चेन्नय पुलिसांच्या हेर पंगडा कडल्यान गोंया सयत हेर राज्यांतल्या मनशांची चवकशी करतात अशें समजता. सद्या तरी मडगांवांतल्या मनशांचे चवकशेक सुरवात जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
