भांगरभूंय | प्रतिनिधी
नवी दिल्ली, खबरां संस्था : फाटल्या वर्सा २ हजार रुपयाच्यो नोटी चलनांतल्यान काडले उपरांत आरबीआयन आपल्या १९ फांट्यांनी ह्यो नोटी बदलपाची सुविधा उपलब्ध करून दिल्ली. ते प्रमाण त्या फांट्यांक भेट दिवन ह्यो नोटी थारावीक रक्कमे मेरेन अदलाबदल करूं येतात. मात १ एप्रीलाक आरबीआयच्या १९ फांट्यांनी ह्यो नोटी अदलाबदल जावच्यो नात अशें आरबीआयन जाहीर केलां.
२००० नोटी सुमार पांच वर्सां आदीं बाजारांत आयल्यो. उपरांत फाटल्या वर्सा मे म्हयन्यांत आरबीआयन औपचारीक अधिसुचोवणी जारी करून २ हजार रुपयाच्यो नोटी वांटपांतल्यान काडपाचो निर्णय जाहीर केलो. देखून हाचेर विरोधकांनी टिका केली. नोटी चलनांतल्यान काडल्यो तरी लेगीत बाजारांतल्या वेव्हारांत ती कायदेशीर मुद्रा उरतली अशें आरबीआयन स्पश्ट केलें. ते उपरांत आरबीआयन ह्यो नोटी अदलाबदल करपाची सुविधा उपलब्ध करून दिली.
१ एप्रीलाक बँकेंतल्या खात्यांचो वर्सुकी नियाळ जाल्ल्यान ह्या दिसा नोटी बदलून दिवपाचें काम पुरायपणान बंद जातलें अशें आरबीआयन स्पश्ट केलां. २ एप्रील सावन ही सुविधा परतून सुरू जातली अशेंय बँकेन सांगलां. ही सुविधा अहमदाबाद, बेंगळुरू, बेलापूर, भोपाळ, भुवनेश्वर, चंडीगढ, चेन्नई, गुवाहाटी, हैदराबाद, जयपूर, जम्मू, कानपूर, कोलकाता, लखनौ, मुंबय, नागपूर, नवी दिल्ली, पाटना आनी तिरुवनंतपुरम हांगा उपलब्ध करून दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
