भांगरभूंय | प्रतिनिधी
फोंडें, प्रतिनिधी: दुर्भाट- फोंडेंच्या साई बाबा देवळांत चोरी जाल्या. बिरेस्तारा रातीं अनवळख्यांनी मुखेल दाराचें कुलूप तोडून फंडपेटी सुमार १०० मिटर अंतराचेर व्हरून फोडली. तातूंतले सुमार ५० हजार रुपया चोरिल्ल्याचो दुबाव देवस्थान समितीच्या पदाधिकार्यांनी उक्तायला. मात देवळांत आशिल्ले सी सी टीव्ही कॅमेरे बंद आशिल्ल्यान पुलिसांक तपास करपाक आडखळ निर्माण जाल्या.
रातच्यो आरती आनी हेर कार्यावळी जाल्या उपरांत ९.३० वरांचेर देवूळ बंद केल्लें. मात शुक्रारा सकाळीं देवस्थान समितीचे अध्यक्ष विश्वनाथ नायक देवळांत आयले उपरांत मुखेल दाराचें कुलूप तोडून फंड पेटी चोरिल्ल्याचें उक्ताडार आयलें. देवळा लागसारा तपासणी केली तेन्ना सुमार १०० मिटर अंतराचेर रानांत फंडपेटी मेळ्ळी. चोरांनी सगळे पयशे चोरिल्ले. फोंडें पुलिसांनी घडणुकेचो पंचनामो केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
