भांगरभूंय | प्रतिनिधी
नवी दिल्ली, खबरां संस्था: फामाद वेवसायीक बिल गेट्स हांणी आयज प्रधानमंत्री नरेंद्र मोदी हांचे कडेन वेगवेगळ्या विशयांचेर संवाद सादलो. बायलां सशक्तीकरणा पसून भारतांत जाल्ली तंत्रगिन्यानाची उदरगतय हाचेर ह्या वेळार चर्चा जाली. बिल गेट्स हांणी विचारिल्ल्या प्रस्नांक प्रधानमंत्री नरेंद्र मोदी हांणी जाप दिली. सध्या सगळे कडेन चर्चा जावपी एआय तंत्रगिन्यानाचेर बिल गेट्स हांणी विचारलें तेन्ना नरेंद्र मोदी हांणी एआयचें म्हत्व आनी एआय तंत्रगिन्याना कडेन पळोवपाची स्वताची नदर हाचेर टिप्पणी केली.
भारतीय भुरगें जल्मल्या उपरांत ‘ए आई’ म्हणटा
ह्या वेळार प्रधानमंत्री नरेंद्र मोदी हांणी टिप्पणी केली, ‘‘एआयचें म्हत्व व्हड आसा. हांव केन्नाय फकांडांनी म्हणटा. आमच्या देशांत आवयक जायत्या राज्यांनी ‘आई’ म्हणटात. आमचे कडेन भुरगें जल्माक येता तेन्ना तें ‘आई’य म्हणटा आनी ‘ए आई’य म्हणटा’’
एआय वापरप लोकांचे दिसपट्टे जिणेंत मजत जावपाक जाय, अशें मोदी हांणी सांगलें. ‘काशी- कामील संगमाम नांवाची कार्यावळ हांवें केली. तमिळनाडूंतल्यान जायते लोक काशींत आयिल्ले. थंय हांव हिंदींत उलयलों. पूण थंयच्या सगळ्या लोकांनी म्हजें तमिळ भाशण एआय वरवीं आयकलें.’ मोदीन ह्या प्रसंगाचो उगडास केलो.
मजगतीं, आमी एआय कसो वापरचो हाचेर उलयतना प्रधानमंत्री मोदी हांणी एआय तंत्रगिन्याना कडेन सर्त करपाची सुचोवणी केली. ‘‘आमी ‘एआय’क जादवाची बडी समजून वापरल्यार तो अन्याय जातलो. आमच्या आळशीपणाक धांपपाक एआयचो वापर करप चुकीचें थारतलें. म्हाका पत्र बरोवपाचें आसल्यार आनी हांवें तें चॅट जीपीटीक सांगलें म्हाका पत्र बरोवन दी म्हणून जाल्यार तें चुकीचें. आमी चॅटजीपीटी कडेन सर्त करपाक जाय. आमी एआयच्या परस मुखार वचपाचो यत्न करपाक जाय’’ अशें मोदी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
