भांगरभूंय | प्रतिनिधी
लंडन, खबरां संस्था ः ब्रिटनाचो मूळ भारतीय वंशाचो प्रधानमंत्री ऋषी सुनक स्थलांतरीत लोकां संबंदी (immigrants) खर पावलां उबारपाक लागला. ब्रिटनांत 4 एप्रील सावन मध्यम पांवड्यावेले शिक्षक, शेफ, नर्स आनी केअर टेकर हांकां वर्साक 41 लाख रुपया पगाराचें पॅकेज आसल्यारुच व्हिसा मेळटलो. आतां मेरेन ही मर्यादा साडे सत्तावीस लाख रुपया आशिल्ली.
सुनक सरकारान वेतन मर्यादा दुपेटीन वाडयल्या आनी ब्रिटनांत रोजगार सोदपी भारतीयां खातीर संकश्ट निर्माण केलां. हाचो परिणाम मध्यम पांवड्यावेल्या नोकऱ्यां खातीर ब्रिटनांत येवपी सुमार दोन लाख भारतीयांचेर जावं येता. हालींच स्किलड वर्क व्हिसा खाला अर्ज करपी आयटी वेवसायिकांची पगार पॅकेज मर्यादा 35 ते 52 लाख रुपया केल्ली.
कुटुंबीक व्हिसा खातीरुय मर्यादा वाडयली
भारतीय कुशळ कामगारांक कुटुंबीक व्हिसा खातीर पगाराची मर्यादा 56 टक्क्यांनी वाडयल्या. हाचे आदीं ब्रिटनांत वर्साक 19.50 लाख रुपया मेळोवपी भारतीय कुटुंबाक व्हिसा खातीर अर्ज करपाक मेळटालो. आतां ही मर्यादा 30.50 लाखां मेरेन वाडयल्या. हो नेम 11 एप्रील सावन लागू जातलो. तशेंच राष्ट्रीय भलायकी येवजणे खाला नोंदणी करपा खातीर भारतीय कुशळ व्हिसा धारकांक वर्सुकी शुल्क 65 हजारांतल्यान 1 लाख 10 हजार मेरेन वाडयलां. एनएचएस शुल्क वाडोवन बिगर निवासी कुटुंबाचे प्रवेश आडावपाचे आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
