भांगरभूंय | प्रतिनिधी
भांगरभूंय । प्रतिनिधी
वास्कोः भाजपाची दक्षीण गोंय लोकसभा मतदारसंघांतली उमेदवार पल्लवी धेपो हिणे वास्कोतल्या दामोदराचें दर्शन घेवन आपल्या वेंचणूक प्रचाराक सुरवात केली. भाजपा महिला मोर्चाच्यो वांगडी आनी भाजपा वावुरप्यांनी देवळांत तिका येवकार दिलो. तांच्या वांगडा प्रदेश भाजप अध्यक्ष आनी राज्यसभा खासदार सदानंद शेट तानावडे, वास्कोचो आमदार कृष्णा साळकार, वास्को भाजपा मंडळ अध्यक्ष दीपक नायक आशिल्ले.
ह्या वेळार पत्रकारां कडेन उलयतना सदानंद तानावडे हांणी आमचे दोनूय उमेदवार व्हडा मताधिक्यान वेंचून येतले असो दावो केलो. दामोदराचें दर्शन घेवंन आमी वास्कोच्यान आमच्या वेंचणूक प्रचाराक सुरवात केल्या. विधानसभा वेंचणुकेच्या प्रचाराक लेगीत आमी वास्कोच्यान सुरवात केल्ली. वास्को आनी दाबोळी मतदारसंघां उपरांत आमचो प्रचार फोडें आनी शिरोडें मतदारसंघात जातलो. 5 एप्रील मेरेन आमी दक्षीण गोंयांतल्या सगल्या मतदारसंघात पावतले. सगल्या मुखेल कार्यकर्त्यांक मेळून जातगीर पल्लवी धेपो आमलो उमेदवारी अर्ज सादर करतली अशें तानावडेन सांगलें. कार्यकर्त्यांची उमेद पळयल्यार दक्षीण गोंयचो जागो आमी जिखतले हातूंत दुबाव ना. आमच्या सरकारातलो घटक पक्ष आशिल्ल्या मगो आनी अपक्ष आमदारांनी आमका पुराय तेंको दिवपाचें जाहीर केला अशें तांणी सांगलें.
दामोदराचें दर्शन घेवंन हांवें वास्कोच्यान प्रचाराक सुरवात केल्या आनी म्हाका जैताची पुराय खात्री आसा अशें पल्लवी धेपो हिणे सांगलें. आमदार कृष्णा साळकार हाणेय धेपोच्या जैताची खात्री दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
