भांगरभूंय | प्रतिनिधी
नवी दिल्ली, खबरां संस्था: सुनावणे पयलींच खंयच्याय लेखाच्या प्रकाशनाक न्यायालयान स्थगिती दिल्यार लेखकाचे अभिव्यक्ती स्वातंत्र्याचेर आनी जनतेच्या म्हायती अधिकाराचेर गंभीर परिणाम जावपाक शकतात, अशें सर्वोच्च न्यायालयान म्हणलां.
सरन्यायाधीश धनंजय चंद्रचूड, न्या. जे. बी. परडीवाला आनी न्या. मनोज मिश्रा हांच्या खंडपीठान सांगलें, स्थगिती दिवप म्हणल्यार आरोप सिद्ध जावचे पयलींच फाशीची ख्यास्त दिवपा सारको.
लेखांतलो मजकूर वायट भावनेचो वा फट आशिल्ल्याचें सिद्ध जाले बगर एकपक्षीय मनाय आदेश जारी करचो न्हय, अशें खंडपीठान नमूद केलें. सुप्रीम कोर्टा मुखार २२ मार्चाक ह्या मुद्याचे सुनावणेची म्हायती मुखार आयली. ब्लूमबर्गान २१ फेब्रुवारीक झी एंटरटेनमेंटा आड एक लेख प्रकाशीत केलो. लेखांत म्हणलां, सिक्युरिटीज अँड एक्स्चेंज बोर्ड ऑफ इंडियाक (सेबी) झी एंटरटेनमेंट लिमिटेडच्या २४१ दशलक्ष डॉलरा विशीं अनियमितताय दिसून आयली.
सेबीन हे विशीं कसलोच आदेश काडूंक ना. हो लेख मुखार आयले उपरांत झी कंपनीन हे आरोप भायर मारले. ‘झी’न म्हणलें, सेबीच्या आदेशा बगर ब्लूमबर्गान चुकीचो, बोगस अहवाल आशिल्लो लेख प्रकाशीत केला. उपरांत तांणी मानहानीचो गुन्यांवूय दाखल केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
