भांगरभूंय | प्रतिनिधी
वेवसायिकांचेर 100 सोंपाणां चडपाचो वेळ
भांगरभूंय । प्रतिनिधी
म्हापशें: म्हापश्यां अबकारी खात्याचें कार्यालय आशिल्ल्या खाजगी इमारतीची लिफ्ट फाटल्या दोन वर्सां सावन बंद आसा. अबकारी कार्यालय पांचव्या माळ्यार आसा. थंय वचपाक 100 सोंपाणां चडचीं पडटात, हे खातीर वेवसायिकांनी खर नाराजी उक्तायल्या आनी ती लिफ्ट ताकतिकेन सुरू करपाची मागणी केल्या.
मरड म्हापश्यां कॉस्मॉस सेंटर इमारतीच्या पांचव्या माळ्यार अबकारी खात्याच्या बार्देस निरिक्षकाचें कार्यालय आसा. बार्देस म्हालांतलीं बार्रां, वायन स्टोराचे धनी आनी रॅस्टोरंण्ट वेवसायीक गरजेचे परवाने मेळोवचे खातीर ह्या कार्यालयांत येतात. सध्या अर्थीक वर्साचे निमाणे कांय दीस उरिल्ल्यान व्हड प्रमाणार वेवसायीक ह्या कार्यालयांत येतात- वतात. मार्च सोंपपाक आशिल्ल्यान बार्देसांतल्या सोरो वेवसायिकांक ह्या कार्यालयांत परवानो नुतनीकरण करपा खातीर येवचें पडटा. पूण लिफ्ट बंद आशिल्ल्यान तांकां गैरसोयींक फुडो करचो पडटा. अबकारी खात्या वतीन ह्या कार्यालयाचे सुवातीचे भाडेपट्टी करारपत्राचें नुतनीकरण करूंक ना. तशेंच प्रलंबीत भाड्याची रकम दिवंक नाशिल्ल्यान दोन वर्सां आदीं लिफ्ट मार्च सोंपपाच्या काळांतूच बंद दवरिल्ली आनी तेन्नाच्यान ती बंद आसा. इमारतीची लिफ्ट बंद आशिल्ल्यान पांचव्या माळ्यार वचपा खातीर 100 सोंपाणां चडचीं पडटात आनी देंवचीं पडटात. ज्येश्ठ तशेंच जाण्ट्यां वेवसायिकांक ह्या कार्यालयांत वचपा खातीर खूब घाम गळोवचो पडटा. गिमाच्या दिसांनी हीं सोंपाणां चडप चडूच त्रासाचें जालां. सरकारान हें कार्यालय दुसरे कडेन व्हरून लोकांक थाकाय दिवची, अशी मागणी वेवसायीक सुशांत साळगांवकार हांणी केल्या.
लिफ्ट तत्काळ सुरू करपाचे निर्देश
गोवा कॅन संस्थेन ही लिफ्ट ताकतिकेन सुरू करपा संबंदांत गोंयचे मुख्य सचीव, वित्त खात्याचे सचीव, गिरायक प्राधिकरणाचे सचीव, उत्तर गोंय जिल्होधिकारी बार्देस, उपजिल्होधिकारी खात्याचे आयुक्त, भौशीक बांदकाम खात्याचे प्रधान अभियंता, उजो पालोवपी दळ आनी नागरी पुरवण खातें हांकां निवेदन सादर केलां. ते प्रमाण दिव्यांग व्यक्ती हक्क कायदो आनी हेर कायद्यांची कारवाय टाळचे खातीर ती लिफ्ट तत्काळ सुरू करपाचे निर्देश उपजिल्होधिकारी उदय प्रभू देसाय हांणी सहकार खात्याचे उपनिबंधक, म्हापशें आनी अबकारी निरिक्षक म्हापशें हांकां दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
