भांगरभूंय | प्रतिनिधी
शीम हुपपाचो परवानो म्हूण दितात सोऱ्याचे बाटलेचें बील
भांगरभूंय । प्रतिनिधी
फोंडें: लोकसभा वेंचणुकेचे फाटभुंयेर मोलें तपासणी नाक्यार सध्या खर तपासणी करतात. ते खातीर खूबशे पंगड तपासणी नाक्यार तैनात आसात. पूण ह्या वाठारांत बारीक नदर मारल्यार गोंयांतल्या विवीध वाठारांतल्या सोऱ्याच्या दुकानांचे धनी गाडी चालकाची फटवणूक करतात अशें दिसता. सोरो खरेदी करतना पियेवपा खातीर दिल्लें बाटल्यांचें बील हेर राज्यांनी सोरो व्हरपाचो परवानो म्हूण वापरपाचो सल्लो हेर राज्यांतल्या गाडी चालकां खातीर त्रासाचो जाला.
गोंयांत व्हड संख्येन पर्यटक कर्नाटक, महाराष्ट्र, केरळ आनी हेर राज्यांतल्यान येतात. परतून वतना पर्यटक सोऱ्याच्यो बाटल्यो खरेदी करून स्वताचे गाडयेंतल्यान व्हरतात. पूण लोकसभा वेंचणुकेचे फाटभुंयेर तपासणी नाक्यार गाडयांची तपासणी करचे खातीर विवीध पंगडांक तैनात केल्यात. गाडयांची तपासणी करतना कितलेशेच पर्यटक पुलिसां कडेन तशेंच हेर पंगडांतल्या अधिकाऱ्यां कडेन वाद घालतना दिसतात. गाडी चालक सोऱ्याच्यो बाटल्यो खरेदी केल्लें बील दाखोवन सुटका करून घेवपाचो यत्न करता. गाडी चालक दाखयता त्या बिलांत तो सोरो पियेवपा खातीर आशिल्ल्याचो उल्लेख आसता, ताका लागून सोऱ्याच्या दुकानाचे धनी आपली फटवणूक करतात, अशें पर्यटकांच्या लक्षांत येवपाक लागलां. फाटल्या कांय दिसांच्यान हेर राज्यांतल्या पर्यटकां कडेन सोऱ्याच्यो बाटल्यो सांपडपाचें प्रमाण वाडलां. ताका लागून पर्यटक सोऱ्याच्या दुकानकाराक दोश दितना दिसतात. सोऱ्याच्या बाटल्यांचें बील घेतले उपरांत त्यो सहज हेर राज्यांनी व्हरपाक शकतात, अशें तांकां भासयिल्ल्याचें लक्षांत येता. ताका लागून गोंयांतल्या सोऱ्याच्या दुकानकारांनी फटवणूक करची न्हय, अशी मागणी हेर राज्यांतल्या गाडी चालकांनी केल्या.
पर्यटन मळार परिणाम जातलोः प्रवीण सोनार
गोंयांत सध्या लोकसभा वेंचणुकेची आचारसंहिता लागू जाल्या. हे फाटभुंयेर सोरो खरेदी करतना सोऱ्याचे दुकानकार पर्यटकांची फटवणूक करतात. दर्यादेग वाठारांत पर्यटकांक सोऱ्याच्या बाटल्यांचें बील दिवन त्यो हेर राज्यांनी व्हरपाक शकतात, अशी फटीची म्हायती दुकानकार दितात. ताका लागून पर्यटकांक पुलीस अधिकाऱ्यांचे कारवायेक फुडो करचो पडटा. दुकानकार पयशे जोडपाच्या नादांत पर्यटकांक फटयता. फुडारांत ताचो परिणाम पर्यटन मळाचेर जातलो, अशें पर्यटक प्रवीण सोनार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
