भांगरभूंय | प्रतिनिधी
म्हापशें: म्हापशें नगरपालिकेन खाशेले बसकेंत 2024-25 ह्या अर्थीक वर्सा खातीरच्या 92.63 लाख रुपयांच्या शिलकी अदमासपत्रकाक मंजुरी दिली.
बुधवारा सकाळीं आयोजीत केल्ले बसकेंत अदमासपत्रकाचेर दनपार मेरेन चर्चा पुराय जावंक नाशिल्ल्यान ती तहकूब केली आनी परतून बसका सांजवेळा 4.30 वरांचेर आपयली. नगराध्यक्षा डॉ. नूतन बिचोलकार हांचे अध्यक्षताये खाला ही खाशेली बसका जाली.
ह्या अदमासपत्रकांत 32 कोटी 17 लाख रुपयांचो महसूल दाखयला. 33 कोटी 25 लाख रुपयांचो खर्च दाखयला. कोयर कराच्या रुपांत 3 कोटी 50 लाख रुपया, वेपारी तशेंच वेवसायीक कराच्या रुपांत 1 कोटी 10 लाख रुपया, घरपट्टीचेर 12 कोटी 50 लाख रुपया, उद्देगीक वसणुकेंतल्या कराचेर 80 लाख रुपया असो महसूल दाखयला.
वेंचणुकेची आचारसंहिता लागू जातली ही म्हायती आसून लेगीत अदमासपत्रक उसरां मांडपा फाटलें कारण नगरसेवक प्रकाश भिवशेट आनी शुभांगी वायंगणकार हांणी विचारलें. हातूंत हलगर्जी केल्ल्या दोशींचेर कारवायेची मागणी भिवशेट हांणी केली.
ह्या वेळार नगराध्यक्षा डॉ. नूतन बिचोलकार हांणी जाल्ल्या कळावाची म्हायती दिली. नव्यो नगराध्यक्षा म्हूण आपणे ताबो घेतले उपरांत उपनगराध्यक्षाची निवड जाली. उपरांत पालिकेच्या स्थायी समितीची निवड जावप गरजेचें आशिल्लें. स्थायी समितीची निवड जावन 15 मार्च दिसा समितीची बसका जाली, पूण 16 मार्च दिसा आचारसंहिता लागू जाल्ल्यान अदमासपत्रका खातीर 18 मार्चाक आपयिल्ली बसका रद्द करची पडली. उपरांत बसके खातीर आयोगा कडल्यान परवानगाी घेवप गरजेचें आशिल्लें अशें तांणी म्हणलें.
वेंचणूक आयोगाच्या परवानगे उपरांत अदमासपत्रकाक मंजुरी हो एकूच विशय बसके मुखार दवरिल्ल्याचें तांणी म्हणलें. फुडारांत योग्य जतनाय घेवन योग्य वेळार अदमासपत्रक सादर करपाचें आस्वासन तांणी दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
