भांगरभूंय | प्रतिनिधी
मागण्यां खातीर केलीं निदर्शनां; एकवटीत रावपाचो फुडाऱ्यांचो उलो
भांगरभूंय । प्रतिनिधी
वास्कोः अखील भारतीय बंदर कामगारांच्या वेतन कबलाती संबंदांत कारणा बगर कळाव जाल्ल्याचो निशेध म्हूण गोवा बंदर आनी गोदी कामगार संघटणा तशेंच मुरगांव बंदर आनी रेल्वे कामगार संघटणेच्या पदाधिकाऱ्यांनी तशेंच वांगड्यांनी बुधवारा 27 मार्चाक विस्वासघात दीस पाळ्ळो. तशेंच मुरगांव बंदर प्राधिकरणाचे प्रशासकीय इमारती मुखार दनपारां निर्दर्शनां केलीं. आपल्या मागण्या खातीर वेगवेगळ्यो घोशणा दिल्यो. अखील भारतीय गोदी आनी बंदर महासंघ तशेंच हेर पांच महासंघांचे सुचोवणे प्रमाण तीं निदर्शनां केलीं.
तिसऱ्या आनी चवथ्या श्रेणी बंदर कामगाराची वेतन कबलात पुराय करपाक कारणा बगर कळाव करतात. ती वेतन कबलात 1 जानेवारी 2022 ह्या दिसा जावपाक जाय आशिल्ली. मात ती अजून जावंक नाशिल्ल्याचो दावो केला. तिसरी आनी चवथी श्रेणी कामगारांक वेतनवाड मेळची हे खातीर भारतीय बंदर वेवस्थापनान कसलोच आदार नाशिल्ल्या युक्तीवादा पासून फाटीं सरचें. संबंदीत कामगारांक वेतनवाड दिवची न्हय हे खातीर मंत्रालयान ज्यो कामगार विरोधी अटी घातल्यात त्यो फाटीं घेवच्यो. मंत्रालयान वाटाघाटी खातीर मार्गदर्शक तत्वां जारी केल्यांत, तीं वाटाघाटी तत्वांच्या आड आसात. तशेंच हेर निर्णय लेगीत कामगार हीत विरोधी आशिल्ल्याचें स्पश्ट केलां.
आतां मेरेन जाल्ले वाटाघाटींत कसलोच म्हत्वाचो निर्णय जावंक नाशिल्ल्यान 6 मार्चाक चेन्नय वाठारांत पांच महासंघांची जोडबसका जाली. तातूंत 27 मार्चाक देशांतल्या सगळ्या मुखेल बंदरांचेर अखील भारतीय विस्वासघात दीस पाळपाचो निर्णय घेतिल्लो. ते प्रमाण मुरगांव बंदरांतली गोवा बंदर आनी गोदी कामगार संघटणा तशेंच मुरगांव बंदर आनी रेल्वे कामगार संघटणा ह्या दोन मान्यताय आशिल्ल्या संघटणांनी विस्वासघात दीस पाळ्ळो.
प्रशासकीय इमारती मुखार निदर्शना केले उपरांत मुरगांव बंदर आनी रेल्वे कामगार संघटणेचे अध्यक्ष अभय राणे तशेंच गोदी कामगार संघटणेचे सरचिटणीस क्रूस मास्कारेन्हस हांणी कामगारां मुखार आशिल्ल्यो समस्या आनी आव्हानांचेर उजवाड घातलो. मागण्यो मान्य जाय मेरेन एकवटीत रावचे, असो उलो तांणी ह्या वेळार मारलो.
ह्या वेळार गोवा बंदर आनी गोदी कामगार संघटनेचे सरचिटणीस बाळकृष्ण फळदेसाय, वागो सुजारे, रवी लुईस, भरत पाटील, उदय फडते, दिलीप नायक, मुरगाव बंदर आनी रेल्वे कामगार संघटनेचे अध्यक्ष उल्हास ठाणेकार, ज्युड डिकॉस्टा, शाहीर खान, बाबूलाल नदाफ, अनील एकोस्कार, करीम मुल्ला, अजीत बोरकार, सियानो फर्नांडीस, एसएम मीना तशेंच कार्यकारिणीचे हेर वांगडी हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
