भांगरभूंय | प्रतिनिधी
पेडणें: नेपाळचे महापौर गोपाल हामल हांची धूव आरती हामल (30) आश्वें मांद्रेंच्या एका रिसॉर्टांत एका म्हयन्याच्यान रावताली. फाटल्या दोन दिसांच्यान ती अचकीत गायब जाल्ल्याची कागाळ तिच्या घरच्यांनी मांद्रें पुलिशेंत केल्ली. ते उपरांत मांद्रें पुलिसांनी तिका सोदपाक सुरवात केली आनी 26 मार्चाक राती वेळार ती चोपडें शिवोली वाठारांतले तिचे इश्टिणी कडेन सांपडली, अशी म्हायती मांद्रें पुलीस स्टेशनाचे पुलीस निरिक्षक शेरीफ जॅकीस हांणी दिली.
आरती गोंयांत योगा मेडिटेशना खातीर आयिल्ली. 13 मार्चाक ती आश्वेच्या एका रिसॉर्टांत आयिल्ली आनी 13 एप्रील मेरेन रावपाची आशिल्ली. मात दोन दिसां आदीं अचकीत आपली कूड उक्ती दवरून ती दर्यादेग वाठारांत गेली. उपरांत ती परतून येवकूंच ना, अशी म्हायती रिसॉर्टाच्या वेवस्थापकान दिली. ते उपरांत रोखडीच मांद्रें पुलीस स्टेशनार कागाळ नोंद केली.
आरती आपले कुडींत केन्ना केन्ना दार बंद करून व्हड आवाजान सावंड सिस्टम लावन नाच करताली, केन्ना केन्ना दार उक्तें दवरूनच नाच करपाली, दर्यादेग वाठारांत रातीर- मध्यान रातीर भोंवपाक वताली. केन्ना केन्ना शुन्यांत नदर लावन बसताली, आपल्याच विचारांत आसताली, अशी म्हायती मेळ्ळ्या. मांद्रें पुलीस निरिक्षक शेरीफ जॅकीस हांणी दिल्ले म्हायती प्रमाण आरती आपल्या इश्टिणी वांगडा शिवोली चोपडें वाठारांत रावताली. ताका लागून तिचो संपर्क तुटिल्लो. मांद्रें पुलिसांनी राती उसरां तिचो सोद लायलो, अशी म्हायती पुलीस निरिक्षक शेरीफ जॅकीस हांणी दिली. ह्या प्रकरणांत फुडलो तपास चालू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
