भांगरभूंय | प्रतिनिधी
पणजी, बातमीदार ः पणजे नगरपालिकेचो मालमत्तेचो वाद सोडोवन पणजे पालिका म्हामंडळाक अर्थीक नदरेन स्वावलंबी करपाचो यत्न करतले अशें मत नव्यान नेमिल्ले महापौर रोहित मोन्सेरात हांणी उक्तायला. बुधवारा महापौरपदाचेर तांची विरोधा विणें निवड जाली. जाल्यार उपमहपौरपदाचेर संजीव नायक हांची विरोधा विणे निवड जाली. आयुक्त क्लेन मदेरा हांणी ही घोशणा केल्या. रोहित हांणी चवथे खेपे आनी संजीव हांणी तिसरे खेपे हें पद स्विकारले.
ह्या वेळार रोहित हांणी सांगलें, ह्या टर्मांत आमी नगरपालिका मालमत्तेचे प्रलंबीत खटले बेगीन निवळावपाचो यत्न करतात. नॅशनल थिएटर, नवी नगरपालिका इमारत आनी हेर अशे तरेचे प्रकल्प मुखार वचत जाल्यार नगरपालिका म्हामंडळाक कोटी रुपया मेळूं येतात. आमी ह्यो मालमत्ता विकचे नात, पूण फकत वेवसायीक वापरा खातीर भाड्यान दितले.
पालिकेची अर्थीक स्थिती घट जाली जाल्यार आमका घरपट्टी वा हेर कर वाडोवचे पडचे नात. आदल्या नगराध्यक्षान ह्या गजालीं कडेन दुर्लक्ष केल्लें. तशेंच मालमत्ते संबंदीत खटल्यांची सुनावणी लेगीत जाय नाशिल्ली. 2016 वर्सा आदल्या काउन्सिलान अधिसुचोवणी जारी करिनासतना घर कर वाडयलो. कांय नागरिक घर कर भरनात. हाका लागून पालिका म्हामंडळाक म्हयन्याक सुमार तीन कोटी रुपया लुकसाण जाता अशें प्रसार माध्यमां कडेन उलयतना तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
