भांगरभूंय | प्रतिनिधी
मडगांव, प्रतिनिधी : राज्यांतली जनशक्त ही कॉंग्रेस आनी इंडिया आघाडी वांगडा आसा. भाजपाचें खरें मुखामळ गोंयकारां मुखार आयलां. सरकारान बेरोजगारी, भ्रष्टाचार, पर्यावरणाचो विध्वंस, कायदो आनी सुवेवस्था तशेंच कोसळिल्ली अर्थवेवस्था हाचेर चर्चा करची, अशें विरोधी पक्ष फुडारी युरी आलेमाव हांणी म्हणलां.
मुख्यमंत्री डॉ. प्रमोद सावंत हांणी कॉंग्रेस फुडारी राहुल गांधी हांकां उक्ते चर्चेंत आव्हान दिलां. हाचेर प्रतिक्रिया दितना युरी आलेमाव हांणी भाजप सरकार गोंयचे अस्मितायेची राखण करपाक अपेशी थारलां असो आरोप केला.
गोंयचे वाडपी बेरोजगारीचेर चर्चा करची, भ्रश्टाचार वाडला. कॅबिनेट मंत्री आनी भाजपाचेच आमदार एकमेकांचेर भ्रश्टाचाराचे आरोप करतात. ग्रीन झोनांत व्हड प्रमाणांत जमनीचें रुपांतर आनी व्हडल्या प्रकल्पांक लागून पर्यावरणाचो नाश जाता. राज्यांत कायदो आनी सुवेवस्था पुरायेन कोसळ्ळ्या, खुनाचे प्रकार वाडल्यात. कायद्याची अंमलबजावणी करप्यांक पत्तो लागनासतना मेल्ल्यो कुडी गोंयच्यान भायर व्हरतात. सिद्धी नायकाच्या दुबावी मरणाच्या तपासाचें कितें जालें? हें सांगचें, अशी मागणी आलेमांव हांणी केली.
भाजप सरकाराच्या इव्हेंट आयोजनाच्या ध्यासान राज्यांत अर्थवेवस्था हाल्ल्या. राज्याचें रीण सुमार ३६ हजार कोटींचेर पावलां. म्हादयच्या मुद्द्यार चर्चा करपाक सर्वपक्षीय शिष्टमंडळाचे प्रधानमंत्री नरेंद्र मोदी हांचे कडेन भेट घडोवन हाडपाक सरकाराक अपेस आयलां. कळसो भांडुरा प्रकल्पाचो डीपीआर फाटीं घेवपाक भाजप सरकार अपेशी कित्याक थारलें, असो प्रस्न आलेमाव हांणी विचारलो.
कॉंग्रेस प्रदेशाध्यक्ष अमित पाटकार हांणी सरकाराक २४ मुद्यांचेर रिपोर्ट कार्ड सादर करपाचो उलो मारिल्लो. मुख्यमंत्र्यांनी आयज मेरेन ताचेर एक उतर काडूंक ना, अशेंय तांणी फुडें म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
