भांगरभूंय | प्रतिनिधी
फकत कांय दिसां आदीं देशांतल्या कोट्यांनी गिरायकांक पेटीएम वॉलेट बंद करपाची समस्या आयली, कारण भारतीय रिझर्व्ह बँकेन पेटीएम पेमेंट्स बँकेच्या सेवांचेर बंदी घाली. पूण पेटीएम युपीआय आजूनय काम करता. आतां १ एप्रील सावन आनीक एक पेटीएम वॉलेट बंद जावपाचें आसा. ताचे फाटलें कारण तुमकां खबर आसा?
ओला मनीन १ एप्रील सावन ल्हान प्रीपेड पेमेंट इन्स्ट्रुमेंट (पीपीआय) म्हणून काम करतले, अशें जाहीर केलां. हाचो अर्थ ताच्या सगळ्या गिरायकांक नव्यान केवायसी करची पडटली, जाल्यार ओला मनी वॉलेट सेवाय उणी जातली. ओला मनीच्या नव्या धोरणांतल्यान ताच्या गिरायकांक फकत ल्हान पीपीआय म्हणून म्हयन्याक चडांत चड १० हजार रुपया लोड करपाक मेळटात. ताच्या गिरायकांक ही सेवा चालू दवरपाची आसल्यार तांकां पुराय केवायसी वरवीं ल्हान पीपीआय कडेन नोंदणी करची पडटली.
गिरायकांक आपलें पाकीट बंद करपाचें आसल्यार ते खातीरूय तांकां पर्याय मेळटलो. हाचे खातीर ताका बँक ट्रान्सफर शुल्क घेनासतना आपल्या वॉलेटा वयल्यान पयशे काडूं येतात. गिरायकांनी खंयचोय पर्याय जर निवडूंक ना जाल्यार तांचें पाकीट १ एप्रील उपरांत स्थगीत करतले.
आतां ओला मनी आपली वॉलेट सेवा बदलता म्हणून दोगांय मदलो फरक जाणून घेवप म्हत्वाचें. ल्हान पीपीआय वॉलेटांत तुमकां म्हयन्याक १० हजार रुपया जमा करपाक मेळटात, पुराय केवायसी वॉलेटा वांगडा तुमकां २ लाख रुपया मेरेन वेव्हार करपाक मेळटात.
तशेंच, स्मॉल पीपीआयंत तुमी पीयर टू पीयर्स हस्तांतर करूंक शकनात, म्हळ्यार एका पाकिटा वयल्यान दुसर्या पाकिटांत हस्तांतर. तुमी फकत दुकानांतूच हाचे वरवीं पेमेंट करूंक शकतात. त्याच वेळार हेरांच्या बँक खात्यांत पयशे हस्तांतरीत करूंक मेळनात, जाल्यार पुराय केवायसी वॉलेट तुमकां सगळ्यो सुविधायो दिता.
ल्हान पीपीआय वॉलेट सादारणपणान कंपनींक तांच्या खाला सेवांच्या फारीकणी खातीर वापरपाक परवानगी दितात. जशें तुमी मॉलांत वा स्टोर मनी कार्डांत पयशे लोड करतात वा तुमचें मेट्रो कार्ड रिचार्ज करतात आनी ती सेवा वापरतात तशें तें काम करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
