भांगरभूंय | प्रतिनिधी
-उमेदवार पल्लवी धेंपे हांकां भोवमतान वेंचून हाडपाचो निश्चेव
-विरोधक श्रीनिवास धेंपो हांच्या उपकारा खालाः आलेक्स सिक्वेरा
पणजीः भाजपाची दक्षीण गोंयची उमेदवार पल्लवी धेंपो हांकां विरोध करपी विरोधक
तांचे घरकार श्रीनिवास धेंपो हांच्या उपकारा खाला आसात. ताका लागून ते मनांतल्यान
विरोध करिनात. जायते बाबतींत पल्लवी हांचे घरकार श्रीनीवास हांणी विरोधकांचेर उपकार केल्यात देखून खऱ्यांनीच ते मनांतल्यान पल्लवी हांचो विरोध करतात काय ना ते विरोधकांनी स्पष्ट करचे, अशें पर्यावरण मंत्री आनी नुवेंचे आमदार आलेक्स सिक्वेरा हांणी म्हणलें.
उद्देजक पल्लवी धेंपो हांकां लोकसभा वेचणुके खातीर दक्षीण गोंयची भाजपाची उमेदवार म्हण जाहीर केल्या. पूण तिचें नांव जाहीर जाले उपरांत तिका विरोधकांच्या टिकेक तोंड दिवचे पडले. पल्लवी केन्नाच लोकां बरोबर वावरुंक ना तिका गोंयच्या समस्येची जाणीव देखून ना. ते भायर पल्लवी हांणी पक्षाचें कसलेंच कार्य करुंक ना तिका तिकेट दिवन भाजपाच्या निष्ठावंत कार्यकर्त्यांचेर अन्याय जाला. ‘क्रोनी कॅपटलिस्मांक’ धेंपो हांकां तेंको दिवपा खातीर पल्लवी हिका तिकेट जाहीर जाल्या, अशे तरेच्या उतरांनी विरोधकांनी टिका करप सुरू केला.
विरोधकांच्या ह्या टिकेक जाप दितना मंत्री आलेक्स सिक्वेरा हांणी म्हणलें, विरोधकांचें काम टिका करपाचे. पूण, खऱ्यानीच कितले जाण विरोधक मनांतल्यान आमच्या दक्षीण गोंयच्या उमेदवारांक विरोध करतात, हे आपणाक जाणा जावन घेवपाक जाय, असो प्रस्न आलेक्स सिक्वेरा हांणी विचारलो.
सगळे विरोधक पल्लवी हांचे घरकार श्रीनिवास धेंपो हांच्या उपकारा खाला आसात. जायते बाबतींत धेंपो हांणी विरोधकांचेर खूब उपकार केल्यात. देखून ते मनांतल्यान विरोध करिनात. कितले जाणांचो विरोध खरो आसा. विरोधकांनी म्हजे आरोप भायरावन दाखोवचे. एका तेंपार काँग्रेसीचे आमदार आशिल्ले आनी आतां भाजपांत मंत्री जाल्ले आलेक्स सिक्वेरा हांणी आव्हान दिलां. मजत करपां बाबतींत श्रीनीवास हे एक सज्जन मनीस. ते सगळ्यांकूच येवकार दितात, अशें आलेक्स हांणी सांगलें.
पल्लवी धेंपो दक्षीण गोंयांतल्यान व्हड मताधिक्क्यान जिखून येतली, अशेंय तांणी सांगलें.
मुख्यमंत्री डॉ. प्रमोद सावंत हांणी तिच्या उमेदवारीचेर विस्वास दवरला आनी तिका वेंचून हाडप ही आमची जापसालदारकी, अशें आलेक्स सिक्वेरा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
