भांगरभूंय | प्रतिनिधी
आयज येतलें फाल्यां येतलें पावून पावना म्हणटा म्हणटां पावलें एकदाचें. सगळ्यांच्या तोंडाक रंग फासून निमाणें वेगळेंच रुपडें सभेमाजार उबें केलें. पयरूच चंद्रकांत दादा पाटील गोंयांत येवन गेले. सरळ नरेंद्र सावयकाराक मेळून गेले. तेन्नाच मनांत पाल चुकचुकली. हो सावयकाराक शांत करूंक बी येवंक ना मूं? आनी आतां तर ताचेर शिक्कोच बसलो. राहूल गांधी हें सुटबुटाचें सरकार म्हणटालो. ह्या कांय दिसांच्यो गजाली पळेत जाल्यार हें उद्देगपतींचें सरकार म्हणूंक तो मेकळो. पयर एकाच दिसा दोन उद्देगपती भाजपांत शिरले. एक नवीन जिंदाल जो पयलीं काँग्रेसींत आसलो आनी जाचेर कोळसा घोटाळ्याचे आरोप आसले आनी दुसरे पल्लवी धेंपे. गोंय भाजपांत तश्यो महिला उण्यो नात. भाजपा महिला मोर्चान हाचे पयलीं भरपूर चळवळ बी केल्या. म्हणटकूच महिलेकूच तिकेट दिवची आसली तर ह्या महिला मोर्चांतल्या खंयच्याय महिलेक दिवंक जाताली. मागीर एक भायली महिला हाडून तिका वांगडी करून घेवन तिकेट दिवपा फाटलो हेतू कळ्ळो ना.
तशी पल्लवीक दक्षीण गोंयची तिकेट दिली म्हणून आक्षेप घेवपाचें कारण ना. जर सोनिया गांधी राजस्थानाक विरोधाविणें चलता जाल्यार पल्लवी दक्षीण गोंयाक चलूंक कितें जालां? तातूंत ती दक्षिणेचीच धूव. दुसर्या राज्यांतल्यान काय आयिल्ली न्हय. म्हणटकूच ती थंयची हांगा कित्याक म्हणपाचो प्रश्न विचारून अर्थ ना. पूण पयलीं सावन पक्षांत आशिल्ल्या आनी पक्षा खातीर काम करपी बायलांचेर अन्याय जाला हें विसरूंक जावचें ना. नवीन जिंदालाचें एक समजूं येता. ताका भाजपा शिवाय पर्याय नासलो. कपड्यां वयलो दाग काडूंक कपडे वॉशींग मशिनांत घालचेच पडटात. नासल्यार ते निवळ कशे जातले? आनीक सद्याक तरी देशांत दुसरें वॉशींग मशीन ना. पूण पल्लवी धेंपेक भाजपांत रिगपाची कितें गरज पडली काय? मनाक प्रश्न पडले बगर रावना.
एका म्हयन्या पयलीं एका भाजपा कार्यकर्त्यान सोशियल मिडियाचेर एक पोस्ट घाल्ली ताचो उगडास जाले बगर रावना. आतां ताका कसलें सपन पडिल्लें तें तोच जाणा जातलो. तेन्ना दक्षीण गोंयांत बायल उमेदवार बी चर्चा जावंक नाशिल्ली. तीन नांवांचीच चर्चा चलताली. तेन्ना त्या कार्यकर्त्यान म्हणिल्लें, जो काम करता ताका ताचें फळ मेळटाच. पूण मदींच भायल्यान कोणूय येवन ताचेर झोंपय मारिना मूं म्हणपाचो भंय दिसता. आज ताचीं उतरां खरीं जाल्लीं दिश्टी पडलीं.
जरी भायल्यान हाडून तिकेट दिली तरी भाजप केडरांतलो कोणूच ताचे आड वचचो ना. तितली हिंमतूच कोणाक जावची ना. हाका मागीर शिस्त म्हणुंया वा भंय पूण एकदां हाय कमांडान थारायलें तें थारायलें. बाकीच्यांनी तोंड धांपून मानून घेवपाचें. पूण हाचो त्रास विरोधकांक जातलोच. आनी पल्लवीची समाज सेवा कितें हाचेर ते प्रश्न विचारतलेच. पूण ह्या प्रश्नाक अर्थ ना. आजवेर जे कोण राजकारणांत आयले तांणी कसली समाजसेवा केल्ली? वेंचणुकेक उबो रावसर वा वेंचून येसर कोणेच समाजसेवा केल्ली दिसची ना. हांची समाजसेवा म्हणल्यार कितें तर खंयच्याय सणा-परबेक आपणालो फोटू आशिल्लीं पोस्टरां लावप. खंयतरी एकादी जायरात दिवप आनी आपणाले वाडदीस मनोवप. कार्यकर्त्यांक चिकन-सोरो घालो म्हणजे जालें. वचत थंय पोस्टरां आनी वर्तमानपत्रांत फोटू आशिल्ल्यो जायराती हाकाच ते समाजसेवा समजतात. जेन्ना वेंचून येतात तेन्ना सरकारी खर्चान हांची समाजसेवा चलता.
म्हणटकूच नव्यानूच राजकारणांत आयिल्ल्यान कितें समाजसेवा केल्या हें विचारपांत अर्थ ना. तशी धेंपो घराण्याची समाजसेवा खूब व्हडली हातूंत दुबाव ना. आज काल न्ही तर जायत्या आदीं सावन ते लोकांची सेवा करीत आयल्यात. जेन्ना पणजेंत खाणावळी नासल्यो वा कोणाक खाणावळी परवड नासल्यो त्या काळार धेंप्याल्या अन्नछत्रांत जेवन आपणालें शिक्षण पुराय केल्लें जायते लोक आसात. हजारांनी लोक ह्या अन्नछत्रांत जेवन गेल्यात. धेंपे समुहान पणजे दोन कॉलजी आनी कांय शाळांचो भार सांबाळ्ळा. पूण हाचें श्रेय पल्लवीक घेवंक मेळचें ना. तशे तिच्या कुळारच्या घारण्यानूय समाजसेवा केल्या हेंय मानचेंच पडटलें. ह्या दोनूय घराण्यांनी जायत्या लोकांक काम दिलां. पूण लोक ह्या कामाक पळोवन मत दितात तर?
म्हाका याद जाता जेन्ना मिनाचो उद्देग बरे तरेन चलतालो आनी कितलेशेच लोक खणींचेर कामाक रावन आपणाले संवसार चलयताले त्या वेळार एक मिनेर वेंचणुकेक उबो रावलो. एक सज्जन, परोपकारी अशीच ह्या मिनेराची कीर्त आसली. कितल्यातरी लोकांक ताणें काम दिल्लें. पूण ताका बरो बरो म्हणप्यांनीच ताका मत दिलें ना आनी जावपाचें तेंच जालें. म्हणजेच लोक आपणाक कोण पावता वा पावला तें पळेनात. लोकांक आज हातार कितें पडटा तें पळोवपाची संवय जाल्या. तातूंत आयच्यो वेंचणुको कोणेय कितलेय ‘मोदी है तो मुमकीन है’ चे नारे लावं, दुडवांचेर चलता हें मानचेंच पडटलें. दुडवां बगर वेंचणुकेंत मत मेळना. आसात कांय लोक जे वर्सा संकिनी त्याच पक्षाक घेवन बसल्यात. तांणी देश बुडयलो तरी तांचेरूच शिक्को मारतात. पूण तितल्यान भागना. कांय मतां विकतीं घेवचींच पडटात. आनी त्याच विकत्या मतांचेर तर सरकार घडटा. म्हणटकूच पल्लवीक जिखतली जाल्यार ह्या विकत्या मतांचो आदार घेवचोच पडटलो, ते नदरेन यत्न करचेच पडटले.
पूण तेच वांगडा जिखून आयल्यार आपूण गोंयचे वतीन संसदेंत तोंड उगडटलीं, गोंयचे प्रस्न थंय मांडटलीं हाचीय खात्री दिवची पडटली. आजवेर गोंयच्यान मौनीबाबा खूब गेले. आतां तरी थंय वतल्यांनी बावलेवरी बसनासतना तोंड उगडचेंच पडटलें. ‘सोबेचें बावलें दिल्लीक पावलें’ हें आमकां परवडचें ना इतलेंच मतींत दवरल्यार पुरो.
अभयकुमार वेलींगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
