भांगरभूंय | प्रतिनिधी
भारतांतलीं म्हानगरां सोडलीं जाल्यार उदरगतीचे बाबतींत आमचें गोंय बरेंच मुखार आसा. केंद्रीय म्हायती तंत्रज्ञान मंत्रालयान फोन, इंटरनॅटा विशींची म्हायती जाहीर केल्या. तातूंत गोंयांत स्मार्ट फोन वापरपी लोकांचो आंकडो 28.45 लाखां मेरेन पाविल्ल्याचें म्हणलां. तर इंटरनॅट वापरपी (मोबायल फोन आनी संगणकाचेर) 20 लाखां परस चड आसात. गोंयची लोकसंख्या 15- 16 लाख आसतली. म्हणजे दरेका गोंयकारा फाटल्यान दोन मोबायल फोन जाले. फुडल्या पांच वर्सांच्या काळांत हो आंकडो आनिकूय फुगपाचो आसा. मात, ह्या तंत्रज्ञानाचो चडांत चड फायदो गोंयाक, गोंयकारांक जातलो, हे खातीर सरकाराक पावलां उबारचीं पडटलीं.
गोंयांत लोकसंख्येचे तुळेन इतले मोबायल फोन आसप ही हेर राज्यांतल्या लोकां खातीर घडये अजापाची गजाल आसत. पूण, गोंयकारां खातीर न्हय. कारण हांगांचें राहणीमान हेर राज्यांचे तुळेन खूबच उंचेलें आसा. प्रत्येक घरगुती सुवाळो, सण, परबो मनोवपाक हांगा नेटाची अर्थीक सर्त लागता. म्हणटकच मोबायलांचो वाडिल्लो आंकडो हीं आमचे खातीर नविदाद न्हय. पूण, ह्या आधुनीक सुविधेचो उजू कारणां खातीर वापर जावंक जाय. गोंयांत कसलीय नवी गजाल आयली की ती विकत घेवपाक लोक घिट्टी घालतात. म्हारग्यो वस्तू, उपकरणां घेवपीय आसात. अडेज- तीन कोटींची गाडी पसून घेवपी नवगिरेस्त गोंयकार आसात. मोबायल फोनांचें उलोवचें जाल्यार 2014 मेरेन गोंयकारां कडेन फक्त 1 लाख 71 हजार मोबायल फोन आशिल्ले. फक्त णव वर्सांनी हो आंकडो 28 लाख 45 हजारांचेर पावला. प्रत्येक स्मार्टफोनाक इंटरनॅट आसताच. कांय नॅटवर्क कंपनींनी तें (डेटा पॅकेज) सवाय भितर दिल्ल्यान सगल्यांनीच तें घेतलां. 10 वर्सां पयलीं हो आंकडो 2 लाख 31 हजार आशिल्लो. तो 20 लाखांचेर पावला. फायबर इंटरनॅट वापरपीय वाडत आसात. गोंयांत पोरूं सप्टेंबर मेरेन 5463 किलोमिटर इतली फायबर आॅफ्टीक केबल घाल्या, अशें मंत्रालय म्हणटा. सरकाराचें स्वताचें ब्राॅडबँड नॅटवर्क सगल्या स्वराज्य संस्थांक ही सेवा दिता. केंद्राची भारत फायबर ही इंटरनॅट सेवाय गोंयांत सुरू जातली. 4 जी खातीर 55 गांव वेंचल्यात तातूंत गोंयांतलेय गांव आसात. म्हणटकच येवपी काळांत इंटरनॅट क्रांती जातली आनी मोबायलांचो आंकडो आनीक वाडटलो.
गांवांगांवांनी केबल घालून घरपोच इंटरनॅट सुविधा दिवपाचें म्हत्वाकांक्षी पावल सरकारान उबारलां. ताका लागून फुडाराक सरकारी सुविधा, सेवा घरांतल्या आॅनलायन पयशे फारीक करून मेळटल्यो. मात, तांच्यो इंटरनॅट वॅबसायटी सारक्यो चलपाक जाय. नॅटवर्क आसलें तरी कांय सायटी चलनात. आनीक पांच वर्सांनी असलो कारभार उपकारपाचो ना. आरटीओ, मामलेदार, बिडिओ आनी हेर म्हत्वाच्या सरकारी खात्यांच्यो सुविधा आॅनलायन उपलब्ध जावच्यो. ताका लागून लोकांचो मोलादीक वेळ वाटावतलो. भ्रश्टाचारूय उणो जातलो. सध्या गुगल पे, पेटीएम, भीम सारकीं जायतीं अॅपां आसात. फाटलीं बरींच वर्सां भारतीय इंटरनॅट ग्राहक तीं वापरतात. म्हणटकच तीं कायम चालू उरतलीं हाचीय जतनाय घेवची पडटली. गोंयांत इंटरनॅट, मोबायल फोन वापरप्यांचो आंकडो वाडला. म्हणटकच लोकांक फटोवपाचीं प्रकरणांय वाडल्यांत आसतलीं. आतां हुबेहुब मूळ कंपनींच्या लिंका सारके दिसपी लींक धाडपी ठकसेन तयार जाल्यात. सगलेच विदेशी न्हय, तर खासा आमचे भारतीय. (हम भी कुछ कम नहीं) तांकां मेकळें रान मेळचें ना, हें सायबर विभागांक पळोवचें पडटलें. कोणाक फटयलो काय कागाळ नोंद जाता. पूण मुखार ते पयशे मेळटाच, अशें ना. अर्थीक वेव्हार करपी आॅनलायन कंपनींनी सुरक्षेचे खर उपाय घेतल्यात, पूण तरीय फटोवपाचे प्रकार हे जाताच. कागाळ नोंद जाली काय तपास कार्य नेटान जावन ते केशीचो सोक्षमोक्ष लागतलो हें पुलिसांक पळोवचें पडटलें.
इंटरनॅट, मोबायल फोन वाडल्यात, ताचो फायदो वेपाऱ्यांक जावंक जाय. सेल, आॅनलायन विक्रेक लागून आमचो धंदो बसला अशें तें सतत म्हणीत आसतात. हाॅटेल वेवसायिकांनी झोमेटो, स्विगी वांगडा भागिदारी करून आपलो वेवसाय वाडयलो, तसो वेपाऱ्यांनीय वाडोवचो. अॅपाचेर वा व्हाॅट्सअॅपाचेर आॅर्डरी घेवन घरपोच म्हाल दिवं येता. कारण भाजी, फळां, कड्डणां, किराणा म्हाल हो लोकांक सातत्यान लागता. सप्तकांतल्यान एकदांच तो ठोक घेवपीय लोक आसात. तांकां आॅर्डर दिवपाक मेळ्ळी आनी घरांत बशिल्ले कडेन म्हाल मेळ्ळो जाल्यार ताचो वेपाऱ्यांकूय फायदो जातलो. कांय फार्मासकारांनी हें सुरू केलां. तेन्ना इंटरनॅट, मोबायल फोन गिरायक वाडटा, ही खोशेची गजाल समजून ताचो स्वता खातीर, राज्या खातीर कसो फायदो जातलो, हाचो विचार करुया.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
