भांगरभूंय | प्रतिनिधी
ड्रंक अॅण्ड ड्रायव्ह प्रकरणां
म्हापशें: ड्रंक अॅण्ड ड्रायव्ह प्रकरणां न्यायालया कडल्यान निकालांत काडटात. उपरांत येरादारी पुलीस स्टेशना कडल्यान नोंद केल्लें सदर प्रकरण निकालांत काडूंक जाय. पूण तशें करिनासतना हणजूण येरादारी पुलीस विभागांत कॅशियर आयटी आशिल्ल्या पुलीस हवालदारा कडल्यान उक्तेपणान न्यायालयाचो अवमान चलयला.
न्यायालया कडल्यान निकालांत काडिल्लीं आसून लेगीत हीं प्रकरणां पुलीस विभागांत प्रलंबीत दाखयतात. नेमाच्या उल्लंघना वेळार सदर वाहन परतून सांपडल्यार वाहन चालकाचेर आनी वाहनाचेर पुलिसांक कसलीच कारवाय करूंक येना.
हालींच हणजूण पुलीस स्टेशनांतल्या 11 कर्मचाऱ्यांची पुलीस खात्यान बदली केल्ली. तातूंतल्या तिगां कर्मचाऱ्यांक निलंबीत केल्यात. ह्या कर्मचाऱ्यांचेर वाहन चालकांची लुबाडणूक केल्ल्याचो कथीत आरोप आशिल्लो.
तशेंच हे कर्मचारी खूबशा वर्सां सावन ह्या येरादारी पुलीस स्टेशनांत कार्यरत आशिल्ले. हो कॅशियर आयटी तशेंच रायटर एच हवालदारूय फाटल्या पांच वर्सां सावन ह्या हणजूण येरादारी पुलीस विभागांत सेवा दिता.
सोरो पियेवन वाहन चलोवपी वाहन चालकांक येरादारी पुलिसांनी धरले उपरांत हें प्रकरण न्यायालया वतीन निकालांत काडटात. न्यायालय वाहन चालकाक दंडात्मक ख्यास्त दिवन जप्त केल्लें वाहन सोडपाचो आदेश दिवन न्यायालय हें प्रकरण निकालांत काडटा. न्यायालयान निकाल दिले उपरांत कॅशियर आयडी आशिल्ल्या पुलीस कर्मचाऱ्यान हें प्रकरण आपल्या पुलीस स्टेशनांतल्यानूय निकालांत काडूंक जाय. पूण अशा प्रकरणांत सांपडिल्ली आनी न्यायालयान निकालांत काडून सोडिल्लीं वाहनां हणजूण येरादारी पुलिशेंत जप्त आशिल्ल्याचीच ऑनलायन कागदोपत्री दिसतात. कारण तीं वाहन धनयां कडल्यान चिरिमिरी घेवपा खातीर संबंदीत कॅशियर आयटी हवालदारा कडल्यान निकालांत काडिनात.
हीं प्रकरणां प्रलंबीत दवरीत आशिल्ल्यान परतून वाहन सांपडल्यार सदर वाहन कारवाय करिनासतना सोडून दिवपा बगर पुलिसां कडेन दुसरो पर्याय नासता. कॅशियर आयडी आशिल्ल्या पुलिसां कडल्यान हीं प्रकरणां गरजे भायर प्रलंबीत दवरपाचो हो प्रकार न्यायालयाचो अवमान थारता.
अधिकाऱ्यांनी हे विशीं जाप विचारल्यार पुलीस विभागाच्या कामकाजांत आडमेळीं हाडपाचो प्रकारूय संबंदीत पुलीस हवालदार करता. तशेंच ह्या पुलीस हवालदाराचे कार्यपद्दतीचेर खूबशा कर्मचाऱ्यांनी आक्षेप घेवन ताचे आड वरिश्ठां कडेन कागाळीय केल्यात.
तशेंच वाहन येरादारी नेमांचें उल्लंघन करपी पर्यटकांक पयशे घेवन सोडून दिवपी ह्या हवालदाराचो एक व्हिडिओय व्हायरल जाला. पुलीस खात्यान चवकशी करून ह्या हवालदाराचेर कारवाय करची अशी मागणी वाहन धनयांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
