भांगरभूंय | प्रतिनिधी
भांगरभूंय । खबरां मेज
पणजीः अभिनेतो रणदीप हुडा हांणी दिग्दर्शीत आनी मुख्य भूमिका केल्लो ‘स्वातंत्र्यवीर सावरकर’ व्हो सिनेमा गोंयांत करमु्क्त करपाची मागणी हिंदू जनजागृती समितीन मुख्यमंत्री डॉ प्रमोद सावंत हांका एक निवेदन भेटोवन केल्या.
विनायक दामोदर सावरकर हांच्या उत्तुंग अशा वावराचेर उजवाड घालपी व्हो सिनेमा आसा. तो विद्यार्थ्या सयत सगल्यांनी पळोवचो असो आसा. सध्या शालेय पाठ्यपुस्तकांत आमच्या देशाक स्वातंत्र्य मेळोवन दिवपा खातीर वावुरल्ल्या क्रांतिकारां विशी चडशी म्हायती ना. दिल्यारुय ती सारकी आसना. विद्यार्थ्यांक क्रांतिकारां विशीं सविस्तर आनी खरी म्हायती मेळ्ळ्यार ताचे विशीं तांच्या मनांत आपुलकी तयार जावंन तांचो देशा विशींचो मोग वाडपाक मजत जातली अशें ह्या निवेदनांत म्हणलां.
स्वातंत्र्यवीर सावरकर सिनेमांत सावरकर हाची जिणेकथा सांगल्या. विशेश म्हणल्यार व्हो सिनेमा सावरकर हांच्या अंदमानांतल्या काळ्या पाण्चे ख्यास्तीची भयावहता चड सखोलपणान मांडटा. नरकयातना सोसून लेगीत सावरकर हाणी आपली जिद्द सोडली ना. सध्या साद्या कारणाक लागून आत्महत्या करपी तरणाटे पिळगे खातीर सावरकर हे आदर्श अशी देख थारता. तांचो राष्ट्र मोग, हिंदुत्व, राजकारण, समाजकारण, साहित्य लेखन हाचेर व्हो सिनेमा उजवाड घालता. व्हो सिनेमा पळयतगीर सावरकर हाचे विशीं पातळल्लो गैरसमज पयस जावपाक मजत जातली. ते खातीर गोंयांत तो करमुक्त (टॅक्स फ्री) करचो अशी मागणी हिंदू जनजागृती समितीन केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
