भांगरभूंय | प्रतिनिधी
काबूल, खबरां संस्था: अफगाणिस्तानांत तालिबान सरकाराचो सर्वोच्च फुडारी मुल्ला हिबतुल्ला अखुंदजादा हांणी बायलां आड एक नवो फर्मान जारी केलो. ते प्रमाण, खंयचीय बायल व्यभिचारांत दोशी सांपडल्यार (तिच्या घोवा बगर हेर दादल्या कडेन लैंगीक संबंद दवरप) तिका फातरान चेंचून मारून उडयतले.
एका ऑडिओ संदेशांत, अखुंदजादान अस्तंती देशांचे लोकशायेक आव्हान दिलें आनी इस्लामीक कायदो शरियाची खर अंमलबजावणी करपाचे आदेश दिले. तांणी म्हणलें – आमी फातर मारून मारतात हो बायलांच्या हक्काचो भंग अशें तुमी म्हणटात. मात बेगीनूच ही शिक्षा व्याभिचाराक लागू जातली. दोशी बायलांक सगळ्यां मुखार चाबकान आनी फातरान मारतले.
तालिबानान बायलांचे हक्क सोंपयले
अफगाणिस्तानांत सत्तेर आयल्या उपरांत तालिबानान बायलांच्या हक्कांचो भंग जावचो ना अशें आस्वासन दिल्लें. अशें आसून लेगीत तांचे हक्क सेगीत उणे करतात. पयलीं चलयांच्या माध्यमीक आनी उच्च माध्यमीक शिक्षणाचेर बंदी घातली. उपरांत तांचे विद्यापिठांतलेंय शिक्षण आडायलें. चडश्या बायलांक काम वयल्यान काडलीं. तांच्या जाग्यार तांच्या कुटुंबांतल्या दादल्यांक नियुक्त केले. अफगाणिस्तानांत बायलांनी ब्युटी पार्लरांनी वचप, खेळ खेळप अश्या जायत्या उपक्रमांचेर बंदी घाल्या.
विद्यापीठांत चलयांक प्रवेश बंद
अफगाणिस्तानांत तालिबानची क्रुरताय वाडत आसा. फाटल्या वर्सा तालिबानान बल्ख वाठारांतल्या खुबश्या चलयांक विद्यापीठांत प्रवेश करपा पसून आडायलें कारण थंय तांची तोंडां वेवस्थीत धापिल्ली नासतात.
शरिया कायदो म्हळ्यार कितें?
अफगाणिस्तानाचेर ताबो मेळ्ळ्या उपरांत देशांत शरिया कायदो लागू करतले, अशें तालिबानान म्हणिल्लें. खरें म्हळ्यार इस्लामाक मानपी लोकां खातीर शरिया ही एक कायदेशीर वेवस्था. खुबश्या इस्लामीक देशांनी हाचो वापर करतात. मात, पाकिस्ताना सयत हेर इस्लामीक देशांनी ताची पुरायेन अंमलबजावणी जावंक ना. तातूंत सदचे जिणे पसून खुबश्या व्हडल्या समस्यांचेर कायदे आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
