भांगरभूंय | प्रतिनिधी
उच्च न्यायालयाचे सरकाराक निर्देश
पणजी, बातमीदार : पणजे स्मार्ट सिटीचीं कामां पुराय जायसर हांगची येरादारी वेवस्था, रस्तो सुरक्षा आनी धुल्ल प्रदूशण आडावपाक कितें उपाय केल्यात, हाची म्हायती दिवची, अशे निर्देश मुंबय उच्च न्यायालयाच्या गोंय खंडपीठान आयज सरकाराक दिले. आतां ह्या प्रकरणाची सुनावणी फाल्यां २७ मार्चाक जातली.
पणजे स्मार्ट सिटी खाला सुरू आशिल्ल्या कामांक लागून तीन नागरिकांक मरण आयलें. तशेंच हांगा सुरू आशिल्ल्या कामांचो थळाव्यांक त्रास सोंसचो पडटा असो दावो करून पणजेच्या आनीक दोगा थळाव्यांनी गोंय उच्च न्यायालयांत जनहीत याचिका दाखल केल्या. हाचेर आयज सुनावणी जाली.
मजगतीं, स्मार्ट सिटीच्या कामांक लागून फाटल्या वर्सा पावसांत पणजेकारांचे हाल जाल्ले. अंदूं मान्सून सुरू जावचे पयलीं हीं कामां जावंक ना जाल्यार फाटल्या वर्सा सारकी स्थिती निर्माण जावपाची शक्यताय आसा. असो मुद्दो याचिकाकर्त्यांनी हाजीर केल्लो. हाचेर सरकार पक्षाच्या वतीन ३१ मे मेरेन सगळीं कामां पुराय करपाचे निर्देश संबंदीतांक दिल्या, अशें उच्च न्यायालयाक सांगलां. हाचेर फाटल्यां फुडली सुनावणी जातली, अशी म्हायती ऍड. अभिजीत गोसावी हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
