भांगरभूंय | प्रतिनिधी
पणजी, प्रतिनिधी: दिल्लीचे मुख्यमंत्री अरविंद केजरीवाल हांकां जाल्ली अटक हें भाजपाचे हुकुमशायेचें प्रतीक. हे दडपशाये आड सगळ्यांनी एकठांय येवप गरजेचें, असो उलो गोंयचे कॉंग्रेसीचे फुडारी तशेंच विरोधी पक्ष फुडारी युरी आलेमाव हांणी मारलो.
मंगळारा आझाद मैदानांत केजरीवालाक अटक केल्ल्याचो निशेध करपा खातीर इंडि आघाडीच्या पत्रकार परिशदेंत आलेमाव उलयताले. ह्या वेळार गोवा फॉरवर्डाचे तशेंच आमदार विजय सरदेसाय, आम आदमी पक्षाचे फुडारी व्हेंझी व्हिएगस, क्रुझ सिल्वा, एल्टन डिकोस्टा आनी हेर पदाधिकारी हाजीर आशिल्ले.
भाजपा सरकार विरोधकांचो आवाज दाबून दवरता. कोण भाजपा आड उलयलो जाल्यार पयलीं त्या मनशाक विकतें घेवपाचो यत्न करतात. तें शक्य ना जाल्यार मागीर तांकां ईडी, सीबीआय अटक करतात. आयज केजरीवालाची अशीच परिस्थिती आसा. घडये फाल्यां ही वेळ सामान्य लोकां मेरेन येतली. देशांत संविधान आनी लोकशाय वाटावपाक जाय जाल्यार लोकांनी भाजपा आड एकठांय येवपाक जाय अशें युरी हांणी ह्या वेळार सांगलें.
लोकसभा वेंचणुकेची आचारसंहिता लागू जाले उपरांत देशांत पयलेच खेपे मुख्यमंत्र्याक अटक जाल्या. केजरीवालांच्या आड कितलेशेच दीस जाले खटलो चालूच आशिल्लो. तांकां अटक करपाचें आसलें जाल्यार पयलींच करूं येताली. दिल्लींत जें घडलें, फाल्यां गोंयांत घडूंक शकता. लोकशायेंत विरोधक आसप गरजेचें. ना जाल्यार भारत पाकिस्ताना सारको ‘बनाना रिपब्लीक’ जातलो अशें सरदेसाय हांणी ह्या वेळार सांगलें.
आपचे प्रदेशाध्यक्ष अमित पालेकार हांणी भाजपाचेर खर टिका केली. केजरीवालाक अटक करपा आड गोंयांतले सगले विरोधी पक्ष एकवटीत जाल्यात. आमचो एकवट पळोवन भाजपा सरकार भियेलां. अप्रत्यक्षपणान आमचेरूय चेंपण हाडपाचो यत्न चल्ला. पूण आमचो एकवट सदां खातीर उरतलो. लोकसभेच्या दोनूय जाग्यांचेर इंडिया आघाडीचो उमेदवार जिंकतलो असो आमकां विस्वास आसा.
सुरवातेक इंडी आघाडीच्या वांगड्यांक आझाद मैदानाच्या गेटीर परवानगी घेवंक ना अशें कारण दिवन पुलिसांनी आडायले. पूण ही भौशीक बसका वा निशेध न्हय तर फकत पत्रकार परिशद अशें सांगून तांकां भितर सरपाची परवानगी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
