भांगरभूंय | प्रतिनिधी
एपीसीसीन उक्तायलो अदमास
पणजी, बातमीदार ः अंदूं सरासरी परस चड पावस पडटलो असो अदमास एशिया पॅसिफीक इकॉनोमिक कॉर्पोरेशन क्लायमेट सेंटर (APCC) संस्थेन उक्तायला. सध्या हो एक प्राथमीक अदमास आसा. मे म्हयन्याच्या निमाणे मेरेन स्पश्ट जातलें. हाचे आदीं कांय आंतरराष्ट्रीय हवामान संघटनांनी अंदूं पावस सरासरी इतलो वा ताचे परस चड आसतलो अशी शक्यताय उक्तायल्या.
अंदूं पॅसिफीक दर्यांतल्या अनुकूल हवामानाक लागून ‘अल निनो’चो परिणाम उणो जातलो. हाका लागून ‘ला-नीना’ परिस्थिती निर्माण जावपाची शक्यताय आसा. ‘ला- नीना’ परिस्थिती भारतीय उपखंडांतल्या पावसाळ्याक फावोशी आसता. हाका लागून जुलय ते सप्टेंबर ह्या काळांत भारतांत चड पावस पडटलो असो अदमास संस्थेन उक्तायला.
अंदूंच्या पावसाळ्याचो लांब काळाचो अदमास भारत हवामान खात्यान अजून जाहीर करूंक ना. पूण खात्यान फाटल्या वर्सा मे 2024 उपरांत ‘अल निनो’चो परिणाम उणो जावन चड पावस पडपाची शक्यताय उक्तायिल्ली. फाटल्या वर्सा 5 जून दिसा राज्यांत मान्सून सुरु जाल्लो. जाल्यार 19 ऑक्टोबराक गोंयां सयत पुराय देशांतल्यान मान्सून ना जाल्लो.
‘अल निनो’ म्हणल्यार कितें?
मध्य पॅसिफीक म्हासागरांत उश्णतायेक लागून उदकाचें तापमान वाडटा. हाका लागून वातावरणांत वेगवेगळीं प्रक्रिया घडटात. हाका लागून फरक पडटा. हाकाच ‘अल निनो’ अशें म्हण्टात. हाका लागून मान्सूनच्या पावसाचें प्रमाण उणें जाता. जाल्यार पॅसिफीक म्हासागराच्या थंडसाणीक ‘ला निना’ अशें म्हण्टात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
