भांगरभूंय | प्रतिनिधी
नवी दिल्ली, खबरां संस्था ः भारताची अर्थीक राजधानी मुंबय ही आशियांतल्या अब्जाधीशांची राजधानी जाल्या. चीनाची राजधानी बीजिंगाक फाटीं घालून मुंबयन पयलेच खेपे ही सुवात मेळयल्या. हांगा 603 चौखण किलोमीटर वाठारांत 92 अब्जाधीश रावतात, जाल्यार बीजिंगांत 16 हजार चौखण किलोमीटर वाठारांत 91 अब्जाधीश रावतात.
‘हुरुन रिसर्चच्या 2024 ग्लोबल रिच लिस्ट’ प्रमाण फाटल्या एका वर्सात २६ नवें लोक अब्जाधीश जाल्यात. जाल्यार बीजिंगांत ह्या काळांत 18 जाणांक हे वळेरेंतल्यान वगळ्ळ्यात. चीनांत 814 अब्जाधीश आसात, जाल्यार भारतांत 271 अब्जाधीश आसात.
संवसारीक पांवड्यार हे वळेरेंत मुंबय तिसऱ्या क्रमांकाचेर पावलां. न्यूयॉर्क पयल्या क्रमांकाचेर आसून हांगा 119 अब्जाधीश रावतात. जाल्यार लंडन दुसरे सुवातेर आसून हांगा 97 अब्जाधीश आसात. अब्जाधीश म्हळ्यार 8,333 कोटी परस चड संपत्ती आशिल्ले लोक.
92 जाणां कडेन 445 अब्ज डॉलराची संपत्ती
अहवाला प्रमाण, मुंबयच्या 92 लोकांची वट्ट संपत्ती एका वर्सात 47 टक्क्यांनी वाडून 445 अब्ज डॉलर मेरेन पावली. त्याच वेळार चीन राजधानींतल्या अब्जाधीशांची संपत्ती 28% उणी जावन 265 अब्ज डॉलर जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
