भांगरभूंय | प्रतिनिधी
दिल्लीक सत्ताधारी-विरोधकांचीं निदर्शनां
नवी दिल्ली, खबरां संस्था: दिल्लीचे मुख्यमंत्री अरविंद केजरीवाल हांकां सक्तवसुली संचालनालयान अटक केली. २८ मार्च मेरेन ते ईडी बंदखणींत उरतले. लोकसभा वेंचणुकेचे फाटभूंयेर केजरीवाल हांकां अटक जाल्ल्यान आपान निशेध केला. केंद्र सरकार सरकारी यंत्रणांचो गैर फायदो घेता अशें सांगून आप विवीध निदर्शनां करता. आयज आपान प्रधानमंत्री नरेंद्र मोदी हांच्या घराक घेराव घातला. जायार दुसरे वटेन भाजपान अरविंद केजरीवाल हांच्या राजीनाम्याची मागणी केल्या.
अरविंद केजरीवाल हांकां फाटल्या सप्तकांत सोरो धोरण घोटाळ्या कडेन संबंदीत मनी लॉंड्रींग चवकशे विशीं ईडीन अटक केल्ली. नैतिकतेच्या आधाराचेर केजरीवाल हांणी दिल्लीच्या मुख्यमंत्रीपदाचो राजीनामो दिवचो, अशी भाजपची मागणी आसा. अरविंद केजरीवाल सध्या २८ मार्च मेरेन ईडीचे बंदखणींत आसतले.
पुलीस उपायुक्त देवेश कुमार महला हांणी, पीएम मोदींच्या घरा भोंवतणी आनीक सुरक्षा तैनात केल्या. पुलिसांनी नवी दिल्ली वाठारांत ५० पेट्रोलिंग वाहनांय तैनात केल्यां. तशेंच सगळ्या दिल्ली मेट्रो स्टेशनांचेर बोर्डिंग/डिबोर्डिंगाचेर कसलेंच बंधन ना. कलम १४४ पयलींच लागू केलां. ताका लागून हांगा कोणाकूच आंदोलन करपाची परवानगी ना. देखून आमी जाय तितले सुरक्षा कर्मचारी तैनात केल्यात. हांगा आंदोलन करप्यांक आमी ताब्यांत घेतले, अशी शिटकावणी तांणी दिली. पटेल चौक मेट्रो स्टेशनाच्या भायर आपान निदर्शनां केलीं. ताका लागून पुलिसांनी तांकां हो वाठार रिकामो करपाचे आदेश दिले. हांगा संचारबंदी लागू केल्ल्याचें सांगून निदर्शनांक परवानगी ना अशें पुलिसांनी सांगलें.
केजरीवालांच्या राजीनाम्या खातीर भाजपाचीं निदर्शनां
मजगतीं, दिल्लीचे मुख्मयंत्री अरविंद केजरीवाल बंदखणींत आसात. तांणी नैतिकतेन राजिनामो दिवचो. तांणी आपली जापसालदारकी कोणायचेर सोपोवची. अरविंद केजरीवाल आजूनय आपल्या पदार आसात. हाचो अर्थ ते सुवार्थी. असुरक्षिततायेक लागून ते आपली कदेल सोडिना, अशें भाजपाचे खासदार हर्षवर्धन हांणी म्हणलें. अरविंद केजरीवालांच्या राजीनाम्या खातीर भाजपान दिल्लींत निदर्शनांय केलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
