ऍन्जीओप्लास्टी कितें तें समजून घेयात
भांगरभूंय | प्रतिनिधी
Angioplasty : शरीरांतल्या खंयच्याच मुखेल धमनींत क्लॉटींग वा गूटां वरीं आडखळ निर्माण जावप. तशेंच काळीज वा फुफ्फुसां मेरेन रगताची पुरवण जावप ना अश्यो समस्या आशिल्ल्या व्यक्तीं खातीर जीव राखपी थारपी अशी ही एक सामकी म्हत्वाची प्रक्रिया. मात हीं प्रक्रिया आजूनय लोकांक समजना. इंटरव्हेन्शनल कार्डिओलॉजिस्ट डॉ. मयुर जैन हांणी हे प्रक्रिये विशींचें विश्लेशण दिलें.
एन्जिओप्लास्टी म्हळ्यार कितें?
एन्जिओप्लास्टी ही एक नॉन-सर्जिकल म्हळ्यार शस्त्रक्रिये बगर, शरीराक बारीक बुराक मारून (मिनिमली इन्व्हेजिव्ह) केल्ली प्रक्रिया. जी ब्लॉक जाल्ल्यो, अरुंद जाल्ल्यो आर्टरीज आनी रगतांतल्यो शिरो उक्त्यो करतात. हे प्रक्रियेंत दुयेंतीक बुराक मारपाचे सुवातेर लोकल ऍनेस्थेशिया दितात आनी मांडयेचे फेमोरेल शिरेच्या मार्गान एक सामको बारीक ट्यूब शरीरांत इप्सीत जाग्यार पावयता. ह्या ट्युबाची एक टोक म्हळ्यार वारो भरपा इतलो ‘बलून’ आसता.
जेन्ना ही ट्यूब (वा कॅथेटर) आडखळ आशिल्ले अरूंद सुवातेर वा ब्लॉकेज मेरेन पावता तेन्ना तुमचे डॉक्टर ती ब्लॉकेज उगडपा खातीर हो बलून फुगोवपाक शकतात आनी रक्तप्रवाहांत आडखळ निर्माण करपी ब्लॉकेजींक कुशीक करपाक शकतात. काळजाक रगताची पुरवण करपी हार्ट आर्टरीजांत असो थर (प्लाक) एकठांय जाल्यार जायते फावटीं काळजा कडेन वा काळजा कडल्यान जावपी रगताचे पुरवणेंत मर्यादा येता. ताका लागून जायते हे प्रक्रियेंतल्यान नव्यान उक्तो केल्ल्या जाग्यार एक स्टेन्ट बसयतात.
अँजिओप्लास्टी कोणा खातीर करतात?
कोरोनरी आर्टरी डिजीस आशिल्ले व्यक्तींचे हार्ट ब्लॉकेजीस पयस करपाक हे प्रक्रियेचो सगळ्यांत चड वापर करतात. मात, शरीराच्या हेर भागांतले जशी मान, हात-पांय, किडन्यो आनी पेल्व्हिस भांगांतल्या अरूंद जाल्ल्या हेर रक्तवाहिन्यांच्या उपचारां खातीरूय तांचो वापर जावपाक शकता. हे प्रक्रियेक लागून शरिरांतल्या अतिम्हत्वाच्या अवयवांक चड प्रमाणांत रक्तपुरवण जाता आनी जेन्ना हेर निदानात्मक तपासण्यांतल्यान खंयचेय एके ब्लॉकेजीचें निदान जाता तेन्ना रोखडेंच हस्तक्षेप करपाक ही प्रक्रिया वापरतात.
उपचार: अँजिओप्लास्टीची परंपरीक पद्धत परिणामी जरी आसली तरी तातूंत रगतप्रवाहची शीर परत अरूंद जावपाची शक्यताय आसता. देखून कार्डिओलॉजीच्या मळार विरघळपी स्टेन्ट्सचो वा वखद सोडपी (ड्रग एल्युटिंग) बलून्सचो वापर करपी अँजिओप्लास्टी सारक्या नव्या उपायांचो सोद लागतना दिसता.
बरें जावपाचो काळ
अँजिओप्लास्टिंतल्यान बरें जावपा खातीर हॉस्पिटलांत कांय वरां खातीर वा एका राती पुरतें रावपाची गरज आसता. तुमचे डॉक्टर्स तुमका घरांतूच काळजी घेवापा खातीर कांय वखदां दितले आनी तुमचे परिस्थिती प्रमाण तुमच्या जेवणांत आनी जिणे पद्दतींत कांय बदल घडोवपाचो सल्लो दितले.
(टीप : हो लेख फक्त म्हायती म्हणून दिला.)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
