गोंयच्या दोगां रेन्ट अ बायक आनी कॅब ऑपरेटरांक अटक

भांगरभूंय | प्रतिनिधी

तेलंगणा पुलिसांची कारवाय

पणजी: तेलंगणांतल्या पंजागुट्टा पुलिसांनी ड्रग्स तस्करी प्रकरणांत हनुमंत बाबुसो दिवकार उर्फ बाबा (हडफडें) आनी विशाल मांद्रेंकार उर्फ पागल (आसगांव) ह्या दोगां रेन्ट अ बायक आनी कॅब ऑपरेटरांक अटक केल्या. ह्या प्रकरणांतले हेर दुबावीत फरारी आसात. तशेंच अटक केल्ले दुबावीत तपासांत सहकार्य करिनाशिल्ल्याचें निरिक्षण नोंद करून हैदराबादच्या जिल्हो आनी सत्र न्यायालयान वयल्या दोगांचोय जामीन अर्ज भायरायला.

तेलंगणा पुलिसांच्या पंजागुट्टा पुलिसांनी 5 फेब्रुवारी 2024 दिसा एरामनझील मेट्रो स्टेशन वाठारांत मर्क्युरी हॉटेला कुशीक धाड घालून नायजेरियन ड्रग्स तस्कर इवुआला उडोका स्टॅनली हाका अटक केल्ली. ताचे कडल्यान 8 कोटी रुपयांचे 557 ग्राम कोकेन, 390 ग्राम एक्टसी टेब्लेट्स, 21 ग्राम हेरॉयन, 45 ग्राम गांजाे, 3 ग्राम एलएसडी ब्लॉट्स, 215 ग्राम चरस, 7 ग्राम अ‍ॅम्फेटामायन आनी 190 ग्राम गांज्या सयत 5.40 लाख रुपया जप्त केल्ले.

उपरांत थंयच्या पुलिसांनी स्टॅनली आड घुंवळे वखदां विरोधी कायद्याच्या विवीध कलमा खाला गुन्यांव दाखल करून अटक केली. नायजेरियन ड्रग्स तस्कर स्टॅनली हाची अदीक चवकशी करतकूच तो दुबावीत हनुमंत बाबुसो दिवकार उर्फ बाबा (हडफडें) आनी विशाल मांद्रेंकार उर्फ पागल ह्या रेन्ट अ बायक आनी कॅब ऑपरेटरांचें मजतीन गोंयांत तशेंच हैदराबादांत ड्रग्स तस्करी करीत आशिल्ल्याची म्हायती दिली. तशेंच हे टोळयेचे हैदराबादांत सुमार 500 परस चड गिरायक आशिल्ल्याची म्हायती मुखार आयली.

मजगतीं, तेलंगणा पुलिसांनी हनुमंत दिवकार हाका पुण्यां सावन जाल्यार विशाल मांद्रेंकार हाका दुसऱ्या पुलीस स्टेशनाच्या गुन्यांवांत गोंया सावन अटक करून कारवाय केली. उपरांत त्या दोगांकूय न्यायालयीन कोठयेंत धाडून दिलो. ह्याच वेळार पंजागुट्टा पुलिसांनी थंयच्या न्यायालयांत अर्ज दाखल करून त्या दोगांची चवकशी करपा खातीर पुलीस कोठी घेतली. ह्या प्रकरणांत त्या दोगांनीय न्यायालयांन पयले फावटी जामीन अर्ज दाखल केल्लो. तो भायरायले उपरांत दुसरे फावटी अर्ज दाखल केलो तेन्ना न्यायालयान वयलें निरिक्षण नोंद करून जामीन भायरायलो. मजगतीं, हनुमंत दिवकार हाणें परतून पुलीस स्टेशनाच्या गुन्यांवांत तिसरे फावटी अर्ज दाखल केला.