भांगरभूंय | प्रतिनिधी
पणजी: स्मार्ट सिटी आड उच्च न्यायालयांत दाखल केल्ले याचिके विशीं आमकां अजुनूय नोटीस येवंक ना. नोटीस वाचले उपरांतूच हाचेर उलोवप सारखें जातलें अशें स्मार्ट सिटीचे एमडी संजीत रोड्रिग्स
हांणी स्पश्टीकरण दिलें. स्मार्ट सिटीची मुखेल कामां आमी 31 मे मेरेन पुराय करपाचो यत्न करतात. पूण 31 मे उपरांत स्मार्ट सिटीची कसलींच कामां आमी हातांत घेवचे नात, अशेंय तांणी म्हणलें.
स्मार्ट सिटीच्या कामांक लागून नागरिकांक जीव व्हगडावचो पडटा आनी ते भायर घाळ कामांक लागून थळाव्यांक त्रास सोंसचे पडटात असो दावो करपी याचिका उच्च न्यायालयांत दाखल जाल्या. स्मार्ट सिटी आड उच्च न्यायालयांत दाखल जाल्ली ही दुसरी याचिका. हे फाटभुंयेर स्मार्ट सिटीचे एमडी संजीत रोड्रिग्स हांणी प्रतिक्रिया दिली.
स्मार्ट सिटी आड याचिका दाखल केल्या हें आमच्या लक्षांत आयलां. पूण न्यायालयान अजून मेरेन आमकां नोटीस काडूंक ना. नोटिसेंतले मुद्दे कितें आसात तें पळयले उपरांतूच समस्या किदें तें आमकां कळटलें आनी आमी तांकां जाप दितले, अशें संजीत रोड्रिग्स हांणी सांगलें. जर कोणांक कसलेय त्रास जाता आसत तर ते लोकांनी आमकां दाखोवन दिवचे, असो उलोय तांणी मारलो.
पणजे शारांतल्या सगल्या सिवरेजीचें काम आनी मुखेल रस्ते 31 मे मेरेनची डेडलायनी भितर पुराय करपाचो आमी यत्न करतात. पूण 31 मे डेडलायन सोंपली काय कसलीच स्मार्ट सिटीची कामां आमी हातांत घेवचे नात. आमचे सगले अभियंते कामाका लागल्यात आनी कामाच्या दर्जा विशीं तांचे लक्ष लागून आसा, अशें संजीत रोड्रिग्स हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
