भांगरभूंय | प्रतिनिधी
म्हापशें: मयडेंच्या म्हापशें न्हंयेच्या पात्राची नितळसाण मोहीम 100 परस अदीक आपवावुरप्यांनी हातांत घेतिल्ली. न्हंयेंत उडयिल्लो सुमार 358 कील कोयर भायर काडलो. उपरांत त्या कोयराचें वर्गिकरण करून ताचो विलो लावचे खातीर मयडें पंचायती कडेन दिलो.
आयतारा 24 मार्चाक बागा कयास्क, ट्रॅव्हल एक्सपी हांचे वांगडा म्हापशें रोटरॅक्ट क्लब आनी हळदोणें भाजप युवा मंडळ हांणी न्हंय नितळसाणीचो उपक्रम आयोजीत केल्लो. ह्या उपक्रमांत 100 परस अदीक आपवावुरप्यांनी वांटो घेतिल्लो. तांकां हे मोहिमे खातीर लायफ जॅकेट, हातमोजे आनी कोयर एकठांय करपाक पोतयो दिल्ल्यो. उपक्रमाची सुरवात संगम म्हापशेंकार हांणी केली. तांकां आदित्य दळवी आनी म्हापशें रोटरॅक्ट क्लबाच्या वांगड्यांनी तेंको दिलो. तातूंत आपवावुरपी कायक बोटी वापरून न्हंयेंत देंवयले.
ह्या उपक्रमाक उर्बा दिवचे खातीर आदले आमदार ग्लेन टिकलो आनी हेरांनी वांटो घेतलो. आपवावुरपी एका हातान पॅडलींग करून न्हंये देगेर सांचिल्लो आनी उफेवपी कोयर काडून देगेर उलयताले. एक किलोमिटर अंतरा वयलें हें न्हंयेचें पात्र ह्या वेळार नितळ केलें. न्हंये देगेर उडयिल्लो कोयर हेर आपवावुरप्यांनी कोयराच्या पोतयांनी वेगळो केलो. एकठांय केल्ल्या 358 कील कोयरांतल्या 128 कील कोयरांत कंवचेच्या कोयराचो आस्पाव आसा. तातूंत मुखेलपणान सोऱ्याच्यो बाटल्यो आशिल्ल्यो. तशेंच 121 कील प्लास्टीक कोयर एकठांय केलो. ह्या कोयरांत सुमार 28 कील रबर मटेरियल कोयर आनी पुनर्वापर करपाक मेळचो ना असो 24 कील कोयर आशिल्लो. तशेंच 57 कील कोयर हेर तरेचो आशिल्लो.
कोयराक लागून विवीध दुयेंसाः आदित्य दळवी
आमी जेन्ना न्हंयेंत देंवले तेन्ना खूब कोयर उफेतना दिसलो आनी तो काडून न्हंय नितळ केली. 100 वरस अदीक लोकांनी हे नितळसाण मोहिमेंत वांटो घेतिल्लो. न्हंयेंतलो कोयर नुस्तें खाता आनी तेच नुस्तें उपरांत मनीस खातात. ताका लागून तो कोयर मनशांच्यो पोटांत वता आनी साबार तरांची दुयेंसां जातात, अशें आदित्य दळवी हांणी सांगलें.
सुक्ष्म प्लास्टिकाचो व्हड हुस्कोः संगम म्हापशेंकार
न्हंयेंत उफेवपी कोयर पळयलो आनी तो काडपा खातीर उपक्रम हातांत घेतलो. तातूंत व्हड संख्येन आपवावुरप्यांनी वांटो घेतलो. गरजेची खबरदारी घेवन न्हंय नितळ केली. सुक्ष्म प्लास्टीक हो आतां व्हड हुस्को आसा. कारण ह्या प्लास्टीकाचे ल्हान कण अन्न सांखळींत वतात आनी अखेर लोकांचेर ताचो परिणाम जाता, अशें संगम म्हापशेंकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
