भांगरभूंय | प्रतिनिधी
दिवचलः पिळगांवां सांतेरी देवळा लागसार आशिल्ले श्रीकृष्ण घुमटी लागसार आनी माठवाड्यार परंपरे प्रमाण होळये दिसा सांजे वेळार ‘राखण्याचे गडे’ उत्सव उमेदीन मनयलो.
ह्या आगळ्या प्रकारांत पिळगांवचे ल्हान भुरगीं गडे जातात. गांवांतले ज्येश्ठ नागरीक आनी जाणकारांनी गायिल्ल्या ‘नमन’ ढोलाच्या तालार हे बालगडे ताल धरतात आनी नाचतात. हो सुवाळो पळोवपा खातीर व्हड संख्येन लोक आयिल्ले.
पिळगांवां होळये दिसा सांजे वेळार राखण्याचे गडे येतात. ह्या राखण्यांच्या गड्यांचेर भार येना. पूण ते खऱ्या गड्यां भशेन ताल धरून नाचतात. ह्या गड्यांक गांवांतले लोक उर्बा दितात.
ह्या गड्या उपरांत आमोणेचे गांवकार पिळगांवच्यान होळी व्हरतात. राती वेळार पिळगांवच्या मुख्य देवळा भायर परंपरीक होळी लायले उपरांत पिळगांवच्या व्हड गड्यांक सुरवात जाता. राती वेळार देवळा मुखार एके खाशेले सुवातेर हे गडे पडपाक सुरवात जाता. ते उपरांत ते रातभर रानांत भोंवतात. दुसऱ्या दिसा सकाळीं हे गडे परतून देवळा मुखा वयले सुवातेर येवन गडे नाच सादर करतात. हें दृश्य पळोवपाक व्हड संख्येन लोक येतात. पिळगांवच्या माठवाड्यार लेगीत परंपरीक राखण्याचे गडे उमेदीन मनयतात. माठवाड्यार एका देवळा लागसार हे गडे मनयतात. ह्या वाड्या वयले ल्हान भुरगे हातूंत वांटो घेतात. तांकां धवें पुडवें न्हेसावन नमन गातात आनी ढोलाच्या तालार ते बालदडे ठेको धरून नाचतात. ह्या गड्यांक लेगीत लोकांनी व्हड संख्येन हाजेरी लायिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
