भांगरभूंय | प्रतिनिधी
भांगरभूंय । प्रतिनिधी
पोरणे गोंयः पोरण्या गोंयच्या दायज वाठारांत व्हडा प्रमाणांत चलिल्ल्या जमीन रुपांतरणाचेर चर्चा करपाक पोरण गोंय पंचायतीचो हॉल बूक करून लेगीत आयत्या वेळार परवानगी दिवक शक्य ना अशें पंचायत सचिवान कळीत केल्ल्यान आयज (मंगळार) जावपाची ही बसका जातली काय ना, व्हो प्रश्न उप्रासला. ग्लेन काब्राल ह्या समाज वावुरप्यान 21 मार्चाक हॉलाची फी भरून तो बसका घेवपाक बूक केल्लो. मात फाटल्या शेनवारा पंचायत सचिवान ताका व्हॉट्सअॅपाचेर संदेश धाडून हॉल बसका घेवपाक दिल्ली परवानगी फाटीं घेतिल्ल्याचें कळयलें.
तुमी हॉल वैयक्तीक कार्यावळ बगर हेर कारणाक वापरतले जाल्यार पंचायत मंडळा कडल्यान पयलीं परवानगी घेवपाक जाय अशें सरपंच मेधा पाटकार हिची सयी आशिल्ल्या व्हॉट्सअॅप संदेशान सांगलां. नगर आनी शार नियोजन कायद्याचें कलम 17 (2) आनी गुंतवणूक प्रोमोशन बोर्डांतले तजविजी खाला पोरण्या गोंयांत जमनीचें रुपांतरण करपाचें काम व्हडा प्रमाणांत चल्लां. ताचेर चर्चा करपा खातीर आपणे हॉल बूक केल्लो. आमी गोंय बचाव अभियानाच्या वांगड्यांक हे संबंदी जाग्रुताय करपाक आपयल्लें. 21 मार्चाक जेन्ना हॉल बूक केलो तेन्ना जाग्रुताय कार्यावळी खातीर हॉल जाय अशें आपणे स्पश्ट केल्लें अशें काब्रालान सांगलें.
हे कार्यावळीं विशीं आपल्याक चड कांय विचारलें ना. 5 हजार रुपये भरून आपणे हॉल बूक केलो. खाजगी कार्यावळ सोडून हेर कार्यावळी खातीर हॉल जाय जाल्यार पंचायत मंडळाचे परवानगीची गरज आसा अशें पंचायत सचिवान फाटल्या शेनवारा आपल्याक कळीत केलें अशी म्हायती ताणे दिली. कांय दिसां आदी ह्या हॉलांत विकसीत भारत ही सरकारी कार्यावळ जाल्ली. जमीन रुपांतरणाचेर लोक जाग्रुताय करपाक आयोजीत केल्ले कार्यावळीक पंचायत मंडळाची परवानगी घेवपाची सक्ती करपा फाटल्यान वेगळेंच कारण आसपाक शकता असें काब्रालान सांगलें.
पंचायती कडल्यान अधिकृत परवानगी घेवपा विशीं अधिकृत पत्र म्हाका मेळ्ळें ना. आयतार आनी सोमाराक सुटी आशिल्ली. नोटिस मेळूंक नाशिल्ल्यान मंगळारा आमी बसका घेवपाक हॉलांत येतले अशें ताणे सांगलें. गोवा बचाव अभियानान पंचायत सचिवाचे कृतीचो निशेध केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
