भांगरभूंय | प्रतिनिधी
अहमदनगर, खबरां संस्था: सोर्याच्या नेटार मनीस कितें करपाक शकता हाचो नेम नासता. सोर्याचे धुंदीर कांय जाण राकेस जातात. अशीच एक धक्को दिवपी घडणूक अहमदनगरांत घडली. थंय सोर्याच्या नेटार एकल्यान आपले बायले वांगडा दोगां धुवांक जिवे लासून उडयलें. ही घडणूक अहमदनगर म्हालांतल्या वडगांव लांडगा हांगा घडली. दुबावाचें भूत बशिल्ल्या एका घोवान आपले बायले वांगडा दोगां धुवांच्या आंगार रॉकेल ओतून तांक जिवीं मारून उडयलीं. आयज सकाळीं ही घडणूक घडली. अजाप करपा सारकी गजाल म्हळ्यार बायल आनी धुवांक मारून उडयल्या उपरांत त्या मनशाच्या तोंडार मात्तूय पश्चाताप दिसनाशिल्लो. तो घरा मुखार आशिल्ल्या एका झाडा खाला सुशेगाद बसलो. हे घडणुकेची म्हायती मेळटांच पुलिसांनी थंय वचून आरोप्याक ताब्यांत घेतले.
मेळिल्ले म्हायती प्रमाण, सुनील गोरख लांडगे अशें ह्या आरोपीचें नांव जावन आसा. जाल्यार लीलाबाई सुनील लांडगे अशें मरण आयिल्ले बायलेचें नांव. तांच्यो दोगूय धुवो ल्हान आशिल्ल्यो. व्हडली धूव ९ वर्सां पिरायेची आनी धाकटी धूव ४ म्हयन्यांची आशिल्ली अशें समजता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
