भांगरभूंय | प्रतिनिधी
फोंडें, प्रतिनिधी: मोलें वाठारांत सोमारा सकाळीं चेक नाक्या लागसारा रानांत गस्तीचेर गेल्ल्या पुलिसांनी बेवारशी परिस्थितींत दवरिल्लो १२.४७० लिटरांचो सोरो जप्त केलो. कुळें पुलिसांनी ह्यो ३७ सोर्याच्यो बाटल्यो जप्त केल्यो. उपरांत हो ५५१५ रुपयांचो सोरो जप्त करून सांगें अबकारी खात्याच्या सुवादीन केलो. कुळें पुलीस स्टेशनाचे निरीक्षक सगूण सावंत हांच्या मार्गदर्शना खाला उपनिरीक्षक सदानंद देसाय हांणी पंचनामो केलो.
लोकसभा वेंचणुकेचे फाटभूंयेर मोलें चेक नाक्याचेर खर तपासणी सुरू केल्या. तशेंच कांय जाण मोलें चेक नाक्याच्या कुशीक आशिल्ल्या रानांतल्यान सोरो व्हेल्ल्यान कुळें पुलीस अदीं मदीं रानांत गस्त घालीत आसतात. सोमारा दनपरां चेक नाक्या लागसारा रानांत गस्तीचेर गेल्ल्या पुलिसांक बेवारशी दवरिल्लो सोरो सांपडलो. सुमार ३७ सोर्याच्यो ल्हान व्हड बाटल्यो मेळ्ळ्या उपरांत पुलिसांनी त्यो जप्त केल्यो. मात ह्या वाठारांत कोणूच मेळूंक ना. जप्त केल्ल्यो सोर्याच्यो सगळ्यो बाटल्यो सांगें अबकारी खात्याच्या अधिकार्यांकडेन दिल्यो. अनवळख्यांनी रानांत दवरिल्ल्यो सोर्याच्यो बाटल्यो कर्नाटक राज्यांत व्हरताले असो दुबाव पुलिसांनी उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
