भांगरभूंय | प्रतिनिधी
पणजी, बातमीदार ः सोमारा पणजे बाजारांत मानकुराद आंब्याचो दर अडीच ते तीन हजार रुपया डझन आशिल्लो. जाल्यार हापुस आंब्याचो दर आकारा प्रमाण दर डझनाक 800 ते 1200 रुपया आशिल्लो. आंब्याचे उत्पन्न वाडले उपरांत फुडल्या कांय दिसांनी आंब्याचे दर उणे जावपाची शक्यताय वेपाऱ्यांनी उक्तायल्या.
फाटल्या सप्तकाच्या तुळेंत पणजी बाजारांत भाजयांचे दर स्थीर आसात. कांदो 35 ते 40 रुपया किल, टमाट 30 रुपया आनी बटाट 40 रुपया दर किल आसा. वांयगें, गाजर 60 रुपया किल आशिल्ले. भेंडीचे दर 20 रुपयांनी उणे जावन 60 रुपया दर किल जाल्यात. कॅप्सिकमाचो दर किलाक 120 रुपया आसा.
सोमारा लसणाचे दर 30 रुपयांनी उणे जावन 250 रुपया दर किल मेरेन देंवल्यात. आलें 40 रुपयांनी वाडून 200 रुपया जाला. फुडल्या कांय दिसांनी लसणाचे दर उणे जावपाची शक्यताय आसा, जाल्यार आल्याचें दर वाडपाची शक्यताय आसा.
मिरसांग, लिंबू हांच्या दरांत वाड
फाटल्या कांय दिसां सावन मिरसांगेचे दर वाडत आसात. सोमारा पणजे बाजारांत मिरसांगेचे दर 120 रुपया किल आशिल्ले. कांय दिसां आदीं 7 रुपया आशिल्लो लिंबू आतां 10 रुपया जाला.
निरपणस 400 रुपया
निरपणसाचे दरय वाडल्यात. मागणी चड आशिल्ली पूण पुरवण उणी आशिल्ल्यान सोमारा पणजे बाजारांत मध्यम आकाराचे निरपणस 400 रुपयाक एक ह्या दरान आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
